1 maji, Rama komenton raportin e BB: “Papunësia ka rënë më shumë se 6%”. Reagon Shehaj
Me rastin e 1 majit, ditës së punëtorëve, kryeministri Edi Rama ka zgjedhur të komentojë raportin e Bankës Botërore për Shqipërinë lidhur me krijimin e vendeve të reja të punës. Nëpërmjet një statusi në rrjetin social Twitter, Rama shkruan se papunësia në Shqipëri, vetëm pak kohë nga marrja e detyrës si kryeministër, ra me 6%.
Ndërkohë që në statusin e tij kryeministri nënvizon të dhënat e këtij raporti, se gjatë vitit 2018 Shqipëria ka krijuar më shumë se gjysmën e vendeve të reja të punës që u krijuan në rajon. Rama shprehet optimist dhe krenar në statusin e tij duke shtuar se ende ka shumë punë për të bërë.
“Sipas Bankës Botërore, Shqipëria ka krijuar në vitin 2018 më shumë se gjysmën e vendeve të reja të punës që u krijuan vjet në rajon! Papunësia ka rënë më shumë se 6% qyshse morëm detyrën. Akoma shumë për të bërë, po askush s’ka bërë dhe s’bën dot kurrë sa NE”-shkruan Rama.
Shehaj i përgjigjet Ramës: Shifra qesharake, pa investime nuk ka punësim
Në emër të Partisë Demokratike, ish deputeti i PD-së Agron Shehaj i përgjigjet kryeministrit, përmes një statusi në Facebook, duke deklaruar se “për Ramën çdo ditë është 1 prill”.
Në reagimin e tij, Shehaj shprehet se janë mbyllur vende pune dhe nuk janë krijuar, teksa shton se ka mungesë të investimeve dhe qindra investitorë të huaj janë larguar nga vendi. Ish deputeti demokrat ndalet edhe në largimet nga Shqipëria.
Sipas tij, shkaku është mungesa e rritjes ekonomike dhe vendeve të punës. Sipas Shehajt, po Rama vjedh pasuritë dhe paratë publike bashkë me klientët e tij e më pas mbulon me gënjeshtra varfërinë dhe prapambetjen.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.