1 makinë për çdo 6 shqiptarë – Në pesë vjet, 3 nga 10 veta blenë një autoveturë

Në fund të vitit 2016, numri i autoveturave në të gjithë vendin arriti në 436 mijë, ose 167 mjete për 1 mijë banorë. Që nga viti 2012, është shënuar regjistrimi i rreth 140 mijë makinave shtesë.

Sipas të dhënave të Institutit të Statistikave, Tirana, Gjirokastra, Vlora dhe Durrësi janë qarqet që numërojnë numrin më të lartë të makinave për frymë.

Në qarkun e Tiranës, i cili zë 37,9% të numrit total të automjeteve, afërsisht 1 në 5 banorë ka në pronësi të tijën një makinë. Në këtë rajon megjithatë ky numër nuk ka pësuar ndonjë rritje të konsiderueshme përgjatë viteve.

Rritja më e madhe i takon qarkut të Gjirokastrës, ku numri i automjeteve është rritur me 85 mjetë për një mijë banorë.

Ndryshimi më i vogël ndërkohë vihet re në qarkun e Korçës, ku në pesë vjet janë shtuar vetëm 33 mjetë për mijë banorë. Tashmë ky qark renditet i parafundit në këtë tregues, sipër Dibrës, e cila ka më pak se 1 veturë për 12 njerëz.

Në rajonin e Shkodrës, qytetarët preferojnë gjithmonë e më tepër të udhëtojnë me motoçikleta dhe ato përbëjnë 1 në 7 mjete transporti, ose rreth 5 mijë motoçikleta nga 37 mijë mjete.

Në të gjithë vendin numërohen edhe 58 kampera, të cilët janë të shpërndarë në Tiranë (17), Vlorë (12), Shkodër (8), Gjirokastër (6), Fier (6), Berat (6), Elbasan (4), Durrës (3) dhe nga një në Kukës e Lezhë.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.