1 vit nga çelja e Qendrës së Thirrjeve – DPT: Mbi 65 mijë tatimpagues kanë përfituar shërbime pa pagesë

Mbi 65 mijë tatimpagues kanë përfituar shërbimin pa pagesë të ofruar nga Drejtoria e Përgjithshme e Tatimeve, kur ka kaluar një vit që nga çelja e shërbimit të ri të komunikimit online ‘Qendra e Thirrjeve.’

Sipas të dhënave të publikuar në faqen zyrtare të DPT-së, në numrin e gjelbër 0800 00 02 kanë mbërritur 9 728 telefonata që nga 1 shkurti i vitit 2017.

Ndërkohë, sa i takon njoftimeve të dedikuara në lidhje me kujtesën për afatet e deklarimit, komunikimet direkte për t’i informuar mbi mundësinë e vetëkorrigjimit, për përfitimin e ligjit të faljes apo edhe për shlyerjen e borxhit, administrata tatimore ka komunikuar me 49 835 tatimpagues.

Ndërkohë, lidhur me komunikimin në kohë reale, i cili realizohet përmes dritares së ndihmës Live Chat, specialistët e administratës kanë komunikuar me 6 073 përdorues e vizitorë të faqes.

Sipas DPT-së, Qendra e Thirrjeve u pa si një instrument ndihmës dhe pa kosto për qytetarët dhe sipërmarrjen. Administrata tatimore premton angazhimin e mëtejshëm për përmirësimin e shërbimeve të ofruara me qëllim minimizimin e kohës dhe kostos së marrjes së tyre.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.