10 vite nga Lehman Brothers – Në Shtator 2008 nisi kriza financiare globale. Do të ndodhë përsëri?

Këtë javë është përvjetori i kolapsit të bankës amerikane Lehman Brothers dhe nisja e krizës financiare globale, ku dështimi i shumë bankave solli recesionin më të madh botëror në një gjeneratë dhe 1 dekadë të rritjes së ngadaltë ekonomike.

Kolapsi i shumë bankave në Britani, SHBA, Gjermani dhe vende të tjera përpara Shtatorit 2008, arriti kulmin kur banka amerikane Lehman Brothers u la të falimentonte, gjë që shkaktoi panik financiar botëror, recesion dhe një paketë të shpëtimit nga Qeveria Amerikane, Rezerva Federale dhe të gjithë fuqitë ekonomike të G20-ës.

Përpara se të falimentonte, që është dështimi më i madh në historinë e SHBA, banka ishte përfshirë në tregtimin e produkteve komplekse derivate (CDO), të përbëra nga kredi hipotekore nga huamarrës me profil të ulët të kreditit.

Pasi njerëzit nuk kishin më mundësi të paguanin për shtëpitë e tyre, këto letra me vlerë që kishin vlerësim të lartë, u kthyen në mbeturinë (junk), gjë që tronditi bilancet e bankave të Wall Street.

Pas kësaj, kriza financiare shkaktoi një rritje të fortë të papunësisë dhe miliona ekzekutime të pronave.

Shefja e Fondit Monetar Ndërkombëtar, Christine Lagarde, tha se sistemi financiar aktual nuk ka krijuar ende imunitet ndaj një eventi të tillë,  por që nëse ndodh, nuk do të ketë të njëjtën formë.

“Tkurrja e tepërt monetare mund të shkaktojë vlerësime të mëdha të valutave.  Shkaku tjetër për shqetësim momentalisht është frenimi i rritjes ekonomike globale nga tarifat tregtare”, paralajmëroi  Christine Lagarde.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.