100-500 mijë lekë për ata që kanë dëmtime të lehta në banesë nga tërmeti i 26 nëntorit! Zgjerohen kategoritë përfituese

Individët që u është dëmtuar banesa nga tërmeti i 26 nëntorit të vitit të kaluar do të përfitojnë grante për meremetimin e tyre. Vendimi i qeverisë që tashmë ka marrë fuqi ligjore parashikon përfshirjen në skemën e granteve të rikonstruksionit edhe të individëve ose familjeve të cilëve:

a) shtëpitë individuale ose banesat e të cilëve kanë pësuar dëmtime thelbësore deri në të mëdha, që konsistojnë në çarje të moderuara në strukture ose çarje të mëdha në mure ndarëse dhe mbushëse ose dëmtim i mureve ndarëse dhe perimetralë, siç përcaktohet nga aktekspertiza e thelluar;

b) shtëpitë individuale ose banesat e të cilëve kanë pësuar dëmtime të lehta strukturore ose dëmtime të moderuara jostrukturore ose çarje në muret ndarëse dhe perimetralë, siç përcaktohet nga aktkonstatimi ose aktekspertiza e thelluar;

c) shtëpitë individuale ose banesat e të cilëve nuk kanë dëmtim strukturor ose kanë dëmtim të papërfillshëm deri në të lehtë jostrukturor, si çarje të lehta në mure ndarëse dhe perimetralë, siç përcaktohet nga aktkonstatimi ose aktekspertiza e thelluar.

Masa e vlerës së rikonstruksionit ose riparimit, mënyra e përdorimit dhe monitorimi, përcaktohen me vendim të këshillit bashkiak të njësisë së vetëqeverisjes vendore, e cila, në të gjitha rastet, nuk duhet të jetë më shumë se:

a) 500 000 (pesëqind mijë) lekë, sipas parashikimeve të shkronjës “a”

b) 250 000 (dyqind e pesëdhjetë mijë) lekë, sipas parashikimeve të shkronjës “b”

c) 100 000 (njëqind mijë) lekë, sipas parashikimeve të shkronjës “c”.

“Brenda 10 (dhjetë) ditëve nga data e nënshkrimit të kontratës përkatëse të grantit, shuma e grantit të përfituar, sipas përcaktimeve të kësaj pike, i kalon përfituesit në një llogari bankare pranë një banke të nivelit të dytë”përcaktohet në vendim.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.