100 Komando në radhët e Policisë së Shtetit! Hyn në fuqi udhëzimi: Si do të bëhet procesi i rekrutimit
Ndryshimet ligjore tashmë i kanë hapur rrugës angazhimit në radhët e Policisë së Shtetit të pjesëtarëve nga Forcat e Armatosura. Udhëzimi i ministrit të Brendshëm për procedurat se si do të përfshihen ushtarakët në polici është publikuar në Fletoren Zyrtare dhe ka marrë fuqi ligjore. Këtë vit parashikohet që 100 ushtarakë të angazhohen në radhët e Policisë së Shtetit.
Referuar udhëzimit, përzgjedhja e ushtarakëve të Forcave të Armatosura për pranim në strukturat e veçanta të Policisë së Shtetit do të bëhet në batalionin “Komando”.
Kriteret e pranimit të ushtarakëve aktivë të Forcave të Armatosura të Republikës së Shqipërisë, për plotësimin e nevojave të veçanta në Policinë e Shtetit, në rolin zbatues, janë:
-të jetë i moshës deri 32 vjeç;
-të ketë gjatësi trupore mbi 175 cm;
-të ketë kualifikime e trajnime të posaçme që lidhen me funksionin;
-të ketë vlerësime të nivelit shkëlqyer ose shumë mirë, për 2 vitet e fundit të shërbimit në Forcat e Armatosura.
Referuar udhëzimit, funksionet policore që do të plotësohen nga ushtarakët e përzgjedhur nga Forcat e Armatosura përcaktohen nga drejtori i përgjithshëm i Policisë së Shtetit, mbi bazën e nevojave në strukturat e veçanta të Policisë së Shtetit.
Pranimi i ushtarakëve të Forcave të Armatosura të Republikës së Shqipërisë, për plotësimin e nevojave të veçanta, në Policinë e Shtetit, do të realizohet nëpërmjet një procesi konkurrimi, i cili shpallet me urdhër të drejtorit të përgjithshëm të Policisë së Shtetit.
Konkurrimi do të zhvillohet në dy faza që parashikojnë verifikimi paraprak, i cili ka për qëllim të verifikojë nëse kandidatët plotësojnë kriteret e përgjithshme dhe ato të veçanta si dhe procesi i vlerësimit të kandidatëve.
Për vlerësimin e kandidatëve parashikohet krijimi i Komisionit të Vlerësimit, i drejtuar nga zëvëndësdrejtori i Policisë së Shtetit dhe 4 anëtarë.
Kandidati, i cili shpallet fitues dhe vlerësohet “i përshtatshëm për t’u pranuar në polici”, i nënshtrohet verifikimit përfundimtar, për të dokumentuar faktin që ai, ose pjesëtarë të familjes së tij, nuk janë të implikuar në veprimtari kriminale. Në rast se ai, apo ndonjëri prej familjarëve, rezultojnë të implikuar kandidati hiqet nga lista, ndërsa procesit të verifikimit përfundimtar i nënshtrohet kandidati i radhës, i renditur në listën e rezultateve, sipas rendit zbritës.
Në përfundim të procesit të verifikimit përfundimtar të kandidatit, bazuar në relacionin e Drejtorisë së Burimeve Njerëzore, drejtori i përgjithshëm i Policisë së Shtetit nxjerr urdhrin për pranimin në Policinë e Shtetit, emërimin në detyrë dhe dhënien e gradës policore në përputhje me vendimin nr. 79, datë 20.2.2019, të Këshillit të Ministrave “Për ekuivalentimin e gradave të Forcave të Armatosura të Republikës së Shqipërisë me gradat e Policisë së Shtetit” dhe funksionit ku emërohet.
SCAN
Lexo edhe:
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.