“100 lekë/l kompanive të transportit” – Balluku shpjegon paketën e rezistencës. PD akuzon qeverinë për çmimet, kërkon ulje taksash

Seanca parlamentare e së enjtes është zhvilluar me debate të ashpra lidhur me situatën e çmimeve në vend përgjatë mocionit me debat të kërkuar nga opozita. Nënkryetarja e Partisë Demokratike ka akuzuar që në fillim të seancës, se në fakt Shqipëria nuk po përballet me një krizë çmimesh të imponuar nga konflikti në Ukrainë, por me një krizë varfërie të shkaktuar nga korrupsioni qeveritar.

Ajo përmendi ushqimet e shportës, çmimi i të cilave është rritur minimalisht me 20%, duke akuzuar se aktualisht 30% e shqiptarëve sot jetojnë me më pak se 5 dollarë në ditë. Tabaku ritheksoi propozimin e opozitës për ulje taksash dhe lehtësim të barrës fiskale për qytetarët e bizneset.

Ministrja e Infrastrukturës dhe Energjisë i ka përkufizuar akuzat e Tabakut tërësisht të pavërteta e me qëllim përfitimi politik. Ajo ju referua paketës së rezistencës sociale të miratuar nga qeveria për shtresat në nevojë, duke theksuar se këto fonde do të mungonin nëse do të uleshin taksat.

Gjatë fjalës së saj, Balluku bëri publike edhe mënyrën si do amortizohen kostot e rritura në naftës për sektorin e transportit, gjë që do të mbajë në nivelet aktuale çmimet e biletave. Ajo tha se Qeveria do të kompensojë me 100 lekë çdo litër naftë të blerë nga kompanitë.

Mocioni me debat i së enjtes u kërkua nga Enkelejd Alibeaj, në cilësinë e kreut të Grupit Parlamentar të Partisë Demokratike.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.