11 këshilla për të kursyer paratë e nevojshme për pushime
A do të donit të kurseni para për të udhëtuar? Por nuk e dini se si? Mos u shqetësoni, gjithmonë ka një zgjidhje për këtë.
Në këtë artikull do të gjeni disa këshilla për të kursyer para ndërsa planifikoni të udhëtoni!
Mbani shënim shpenzimet tuaja
Ndoshta kjo është gjëja më e rëndësishme në këtë listë këshillash për kursimin e parave. Është e lehtë të shpenzosh para. Ne njerëzit shpesh priremi të nënvlerësojmë se sa para kemi shpenzuar në total. Gjurmo të gjitha shpenzimet tuaja, duke përdorur një aplikacion ose shkruani gjithçka në letër. Kjo do t’ju duhet për të caktuar një buxhet maksimal të shpenzimeve, i cili ju lejon jo vetëm të jetoni, por edhe të kurseni mjaftueshëm para për të shkuar në udhëtimin e ëndrrave tuaja.
Përdorni një biçikletë për transport
Është koha për të shitur makinën, nëse keni një të tillë. Makinat janë të shtrenjta dhe po ashtu edhe karburanti. Transporti publik mund të jetë një opsion, por në afat të gjatë mund të kurseni shumë duke përdorur një biçikletë për transport. Nëse destinacioni juaj i përditshëm ndodhet shumë larg (psh 2 orë larg) ndoshta transporti publik do të jetë alternativa më e mirë. Për sa kohë do të mund të shmangni një makinë, ndoshta mund të kurseni mjaftueshëm para për këtë udhëtim! Nëse nuk keni një biçikletë sot, mund të blini një biçikletë të dorës së dytë më lirë.
Filloni të gatuani për veten tuaj
Të hash jashtë në ndonjë restorant është e shtrenjtë, dhe nëse dëshironi të kurseni para për të udhëtuar, është e nevojshme të filloni gatimin për veten tuaj. Shpenzimet ditore për ushqim, apo pije çdo ditë, nuk është diçka që llogaria juaj bankare do të dëshironte. Është e lehtë të shpenzosh 10,000 – 20,000 lek në muaj vetëm duke ngrënë jashtë. Por nëse filloni të gatuani më parë në shtëpi dhe të shmangni ushqimin e përditshëm jashtë, shumë shpejt mund të filloni të kurseni për udhëtimin tuaj.
Blini ushqime që janë në ofertë javore
Kjo këshillë i shkon pas përgatitjes vetë të ushqimit. Nëse përshtateni tek gatimi juaj i përditshëm dhe duke blerë atë që është në ofertë javore, do të shihni shumë shpejt një rritje të kursimeve në llogarinë tuaj. Një këshillë tjetër është ajo e të blerit të ushqimeve pranë datave të skadencës. Dyqanet ushqimore shpesh kanë çmime të ulëta për produktet të cilat janë shumë pranë datës së skadencës. Ulja e tyre mund të variojë nga 20 -50% më lirë. Nëse e bëni këtë javë pas jave do të kurseni një pjesë të mirë parash.
Gjeni aktivitete falas
Ndalo shpenzimet e parave për tarifat dhe aktivitetet që kushtojnë. Një vrap në mëngjes nga liqeni, apo nga parku më i afërt i shtëpisë, mund t’ju kursejë ca para nga tarifa mujore e palestrës.
Redukto alkoolin dhe cigaren
Le të jemi të sinqertë. Alkooli është i shtrenjtë (të paktën në qoftë se jeni duke e blerë nga xhepi juaj). E njëjta vlen edhe për cigaren. Asnjë nga këto nuk është e mirë për shëndetin dhe portofolin tuaj. Nëse nuk dini si t’i ndaloni të dyja, të paktën lini njërën. Le të themi se kostoja e një paketë cigaresh kushton rreth 200 lek. Nëse konsumoni 5 paketa çdo javë, do të thotë që shpenzoni 4000 lek në muaj, apo 48000 lek në vit. Kjo vlerë është e mjaftueshme për 1 ose 2 bileta të prera disa muaj më parë me ofertë.
Reduktoni faturën tuaj të telefonit
Gjithmonë të pasurit e një telefoni më të fundit mund të kushtojë, edhe pse mund të mendoni se një iPhone apo Samsung i ri duhet të jetë në shpenzimet tuaja, portofoli juaj mund të mos pajtohet me këtë ide. Kurseni dhe nga shpenzimet mujore të telefonatave, shikoni për paketa ofertë të cilat kompanitë ofrojnë. Nëse e bëni këtë, me siguri në fund të muajit do të keni kursyer ca para.
Evitoni shtëpitë me qira nëse keni prindër
Kostoja me qira e një apartamenti është mjaft e madhe, sidomos nëse jeni vetëm dhe ju duhet ta përballoni nga xhepi. Një shtëpi normale për një person, mund t’ju kushtojë nga 10000 lek deri në 20000 lek. Nëse keni prindër dhe jeni vetëm, mund të jetë një alternative shumë më e mirë kthimi në shtëpi, duke kursyer para sa për një udhëtim në fund të vitit.
Gjeni një shok dhome
Nëse shpërngulja në shtëpinë e prindërve nuk është një opsion, mund të shikoni të ndani qiranë bashkë me një shok dhome në mënyrë që të ndani faturat e qirasë me të. Në këtë mënyrë do të mund të përgjysmoni vlerën e faturës, dhe të mund të kurseni mjaftueshëm para.
Ndaloni së ngrëni vaktet e vogla
Ëmbëlsirat, pijet me gaz, apo patatinat, nuk janë të mira për shëndetin tuaj, dhe sigurisht as për portofolin tuaj. Megjithatë, vaktet e vogla bëhen një zakon dhe vështirë të hiqet dorë. Nëse shpenzoni para për to, bën mirë të gjeni një mënyrë se si mund të ndaloni së bleri çdo ditë këto artikuj, të cilat nuk kanë vlera ushqyese të domosdoshme për trupin tuaj.
Detyrimi për të kursyer duhet të kthehet në një domosdoshmëri.
Nëse nuk jeni të angazhuar për të kursyer para, ose të paktën të angazhoheni për qëllimin tuaj për të udhëtuar më shumë, me siguri që ëndrra për të pasur sa më shumë udhëtime do të mbetet veç një ëndërr dhe jo më shumë. E njëjta gjë vlen edhe për çdo gjë tjetër në jetë. Me të vërtetë të arrish të bësh një ndryshim në jetë kërkon vetëbesim, durim dhe sakrificë. Nëse mendoni se ata që I realizojnë gjërat që duan, e kanë të thjeshtë se nuk ndodhen në pozicionin tuaj, gaboheni. Ata janë thjesht më të vendosur se ju për të realizuar një objektiv që i kanë vendosur vetes. Qëllimi në jetë, është dhe faktori kyç që na evidenton për të qenë ndryshe nga shumica e fjetur. Hapni sytë, flitini vetes, asgjë nuk është e pamundur nëse keni besim. Filloni të ndryshoni me gjërat e vogla, që të mund të ndryshoni në gjërat e mëdha.
Ada Xhagolli/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.