11 mikrohapësira publike në Tiranë – Projekti me vlerë 100 milionë lekë, ja ku do të ndërhyhet
Kryeqyteti do të ketë 11 mikrohapsira të reja publike. Bashkia e Tiranës ka parashikuar vënien në jetë të projektit me vlerë 100 milion lekë që ka si qëllim krijimin e hapësirave publike dhe rikonceptimin e atyre ekzistuese.
Në buxhet është detajuar se faza e parë e projektit do të nisë me 11 hapësira publike në pole tashmë të krijuara, të dukshme dhe me ndikim të menjëhershëm, ndërsa në të ardhmen projekti mund të vazhdojë duke u zgjeruar drejt brendësisë së lagjeve dhe periferisë.
Konkretisht parashikohen 3 tipologji ndërhyrjeje në mikrohapësirat publike: Hapësirat publike të ndërmjetme, ritrajtim i hapësirave ekzistuese dhe hapësirat publike mes pallateve.
Hapësirat publike të ndërmjetme transformojnë hapësirat e mbipërdorura dhe të panevojshme për qarkullimin e makinave në hapësira publike.
Këto hapësira publike rikonfigurojnë kryqëzime që janë të pasigurta apo të papërdorura, duke i kthyer në një landmark të qytetit e duke ndikuar lagjen e bizneset përreth.
Në këtë projekt janë përfshirë 7 hapësirat publike të ndërmjetme si: Kafe Flora, Kont Urani, Selvia, Medreseja, Stadiumi Dinamo, blloku Partizani.
Sa i përket ritrajtimit të hapësirave publike ekzistuese, në këtë projekt janë: Sheshi Kasharit, Lulishtja Çajupi, 5 Maji. Ndërsa në hapësirat publike mes pallateve, do të ndërhyhet konkretisht në bllokun e banimit Laprakë dhe Selitë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.