15 mijë biznese i “kalojnë” – AKU Zgjerohet gama e kontrollit, si do të ankimohen gjobat

Rreth 15 mijë biznese që aktualisht kontrollohen nga Inspektorati Shtetëror Shëndetësor, do të kalojnë në “varësi” të Autoritetit Kombëtar të Ushqimit. Ministria e Bujqësisë dhe Zhvillimit Rural ka hedhur për konsultim projektligjin “për ushqimin” , ky përmes ndryshimeve, synohet që kalimi i kompetencës së inspektimit nga ISHSH tek AKU, të forcojë më tej sigurinë ushqimore dhe të ulë barrën e inspektimit nga 2 organe inspektimi për të njëjtat kategori biznesesh.

Aktualisht  AKU ka 260 inspektorë, ndërsa ISHSH rreth 220 inspektorë. Kalimi i kompetencave për inspektimin e 60% të bizneseve nga ISHSH tek AKU, parashikohet që të shoqërohet gjithashtu edhe me kalimin e 120 inspektorëve nga njëri institucion tek tjetri . Një tjetër ndryshim i bërë në ligj lidhet me ngritjen e një Komisioni të Posaçëm pranë Ministrisë së Bujqësisë për ankimimin e gjobave të vendosura ndaj bizneseve, kur vlera e përgjithshme e tyre në një inspektim të vetëm është mbi 300 mijë lekë.

Kërkesë kjo e ardhura nga shoqatat e biznesit në sektorin agroushqimor. Në relacion thuhet, se ky projektligj, ka për objektiv të sigurojë bazën për të garantuar që çdo hallkë e zinxhirit ushqimor të jetë shumë e fortë për të arritur synimin që shëndeti i konsumatorit të jetë plotësisht i mbrojtur. Ky objektiv është i vlefshëm pavarësisht nga fakti nëse ushqimet prodhohen në Shqipëri apo importohen nga vende të tjera .

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.