150 mijë euro për studentët e ekselencës që do të studiojnë në SHBA

Ministri i jashtëm në detyre, Gent Cakaj, ka nënshkruar dje Memorandumin e Mirëkuptimit mes SHBA dhe Shqipërisë për zbatimin e programit Fullbright në fushën e arsimit, së bashku me asistent-sekretaren amerikane të shtetit për Çështjet e Arsimit dhe Kulturës, Marie Royce.

Falë këtij Memorandumi, duke filluar që në vjeshtën e këtij viti, qeveria shqiptare do të vendosë në dispozicion 150 mijë euro për të gjithë ata studentë ekselentë që do të përzgjidhen për të vijuar studimet në Shtetet e Bashkuara të Amerikës nëpërmjet programit Fullbright, ka bërë me dije Cakaj.

Sipas tij, ky buxhet do të jetë i përvitshëm dhe do të rrisë me disa herë kuotat e studimit të studentëve shqiptarë në universitetet më prestigjioze amerikane në programe shkencore që variojnë nga 3 muaj deri në 24 muaj.

Kjo nismë në fakt vjen në kuadër të paktit të qeverisë shqiptare dhe angazhimit të saj maksimal për një vëmendje të shtuar ndaj studentëve, për të nxitur rritjen e cilësisë së arsimimit dhe inkurajuar rezultate sa më të larta në studimet universitare, ka mbyllur njoftimin e tij ministri.

E.S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.