156 mln euro importe nga Rusia dhe Ukraina – Çfarë blejmë nga këto shtete? Lufta, ndikim në çmime!
Lufta midis Rusisë dhe Ukrainës mund të sjellë pasoja ekonomike edhe në vendin tonë, që lidhen kryesisht me rritjen e çmimeve, për shkak të varësisë së konsiderueshme që kemi nga importi. Kështu, referuar të dhënave të INSTAT, vendi ynë ka importuar nga Rusia rreth 15 miliardë lekë produkte gjatë vitit që lam pas.
Lista kryesohet nga ushqim dhe pije dhe duhan me 6.4 miliardë lekë, e ndjekur nga minerale, lëndë djegëse dhe energji elektrike me 4.1 miliardë lekë, materiale ndërtimi dhe metale 2 miliardë lekë; Produkte kimike dhe plastike 1.8 miliardë lekë, ndërsa produkte të tjera si prodhime druri e letre, makineri dhe pjesë kembimi apo tekstile dhe këpucë janë në vlera me të ulëta. Tek grupi i ushqimeve, një pjesë të konsiderueshme e zë import i grurit nga ku vendi ynë blen më së shumti për të mbuluar kërkesën konsuamatore.
Ndërsa importet nga Ukraina janë në vlerë më të ulët, ku në vitin 2021 janë regjistruar në total në rreth 3.7 miliardë lekë, të cilat kryesohen nga ushqim, pije duhan me 2 miliardë lekë; Materiale ndërtimi dhe metale me 1.2 miliardë lekë. Në total nga të dyja vendet gjatë vitit 2021 kemi blerë rreth 18.7 miliardë lekë produkte apo 156 milionë euro. Ajo që vihet re është se importet nga këto dy shtete janë rritur në mënyrë të ndjeshme në vlerë gjatë viteve 2020-2021 në krahasim me vitet e mëparshme.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.