168 mln fëmijë në botë punojnë – Në Shqipëri 8.3% lënë shkollën për punën

Puna e fëmijëve mbetet një ndër plagët më të mëdha në shumë vende të botës, përfshirë edhe Shqipërinë.

Sipas indeksit “Fundi i Fëmijërisë”, 168 milionë fëmijë në botë punojnë, prej të cilëve 85 milionë në punë të rrezikshme.

Sipas “Save the Children”, shumica e fëmijëve shqiptarë janë të angazhuar në sektorin agro-bujqësor, por edhe sektorët e tregtisë, industrisë minerale dhe hoteleri-turizmit kanë një numër të konsiderueshëm të fëmijëve që punojnë.

Në vendin tonë, sipas këtij indeksi, për periudhën kohore 2011-2016, 8.3% e fëmijëve janë jashtë sistemit arsimor të ulët dhe të mesëm.

Në vitin 2015, bota bëri një premtim se deri në vitin 2030 të gjithë fëmijët do të ishin në shkollë, të mbrojtur dhe të shëndetshëm, pavarësisht se kush janë dhe ku jetojnë.

Sipas indeksit “Fundi i Fëmijërisë”, pavarësisht se ky premtim është ambicioz, është i arritshëm nëse qeveritë investojnë tek çdo fëmijë për të garantuar që ata të gëzojnë një fëmijëri të plotë, ashtu siç e meritojnë.

Në raport thuhet se, 1 në 6 fëmijë të moshës shkollore në mbarë botën është aktualisht jashtë sistemit shkollor. Ndërkohë, 1 në 80 fëmijë largohet nga shtëpia i detyruar nga konflikti që rrjedh nga ekonomia e dobët.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.