179.1 milionë lekë për zhvillimin e zonës turistike të Golemit/ Shpallet tenderi

Fondi Shqiptar i Zhvillimit ka shpallur një tender me fond limit 179.1 milionë lekë për  zhvillimin e zonës së Golemit.

“Projekti fillon në dalje të nënkalimit të Golemit, duke u shtrirë në pothuajse të gjitha rrugët kryesore të Golemit. Kjo rrugë është e përbërë nga 9 akse kryesore me një gjatësi totale rreth 2 kilometër”  specifikohet në detajet e tenderit.

Ky investim, pritet të sjellë një zonë rekreacioni, të pasur me gjelbrim, pemë të larta e rrugica të ngushta. Nga ana tjetër, projekti parashikon edhe krijimin e zonave të pushimit, me stola, apo kënde lojërash për fëmijë.

“Këto elemente të ndërthurur e bëjnë këtë njësi administrative që të ketë një impakt viziv tërheqës për banorët e kësaj zone dhe turistëve të shumtë që kjo zonë ka” specifikohet më tej në dokumentet bashkangjitur tenderit.

Projekti pritet të nisë me shembjen e godinave të vjetra fillimisht,  në të cilat më pas do të zbatohet krijimi i lulishteve.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.