2.44 mln euro për vaksinën e Pfizer – Marrëveshja me kompaninë, qeveria miraton shtesën e fondit për pagesën e radhës
Këshilli i Ministrave ka miratuar një shtesë fondi për Ministrinë e Shëndetësisë dhe Mbrojtjes Sociale, që do të shkojë për vaksinat e siguruara përmes marrëveshjes së lidhur me kompaninë Pfizer Export B. V.
Në total shtesa e fondit është 2.44 mln euro, tkesa vendimi saktëson se ajo do të përdoret pikërisht për kryerjen e pagesave të përcaktuara në marrëveshjen e nënshkruar për prodhimin dhe furnizimin, në datë 18 janar 2021.
Ndërkohë që, ky fond do të përballohet nga fondi rezervë i buxhetit të shtetit. Kjo nuk është hera e parë, që Këshilli i Ministrave përdor fondin rezervë për blerjen e vaksinave përCOVID-19. Deri më tani janë miratuar edhe 3 vendime të ngjashme.
2 prej tyre parashikonin shtesën e fondit për Ministrinë e Shëndetëisisë me nga 10 mln USD për pagesën sipas kushteve të përcaktuara në marrëveshjen me distributorin turk për vaksinën Coronavac, të prodhuar nga kompania Sinovac. Ndërsa vendimi i tretë parashikonte shtesën e fondit prej 497 500 USD për vaksinën ruse. Marrëveshjet e nënshkruara për sigurimin e vaskinave për COVID-19 nuk janë bërë asnjëherë publike, duke u konsideruar si secret tregtar.
Kjo ka sjellë që edhe çmimi me të cilin janë siguruar dozat e vaksinës të mbetet i panjohur për publikun. Në vendin tonë po aplikohen disa vaksina, ndërkohë që muaji gusht është i hapur për vaksinime për të gjithë personat mbi 18 vjeç.
Sipas të dhënave nga Ministria e Shëndetësisë, të përditësuara në datën 17 gusht, janë realizuar 1 330 754 doza të vaksinës për COVID-19, ndërkohë që 572 816 qytetarë qytetarë apo rreth 43% e tyre i kanë marrë të dyja dozat e vaksinës. Ndërkohë që, kurba e infeksionit në vend po pëson rritje çdo ditë, teksa deri në datën 19 gusht numërohen 4204 raste aktive.
SHPENZIME PËR BLERJEN E VAKSINAVE PËR COVID-19
20 mln USD Vaksina e Sinovac
497 500 dollarë Vaksina e Institutit Gamaleya
2.44 mln euro Vaksina e Pfizer
Ola Mitre/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.