2 qendra të reja shëndetësore në Dibër – Përfitojnë 30 mijë banorë
Ka përfunduar plotësisht rehabilitimi i dy qendrave shëndetësore në qarkun e Dibrës, konkretisht në Maqellarë dhe Shupenzë që do të ofrojnë shërbim shëndetësor 24 orë për 30 mijë banorë të këtyre zonave.
Gjatë inaugurimit të tyre, ministrja e Shëndetësisë dhe Mbrojtjes Sociale, Ogerta Manstirliu, tha se po vendoset një standard i ri në shërbimi parësor me rikonstruksionin e qendrave shëndetësore dhe se brenda vitit do të rehabilitohen 80 të tilla në të gjithë vendin.
“Po vendosim një standard të ri në shërbimin parësor me rikonstruksionin e qendrave shëndetësore model për nga instrastruktura dhe pajisjet, siç janë qendrat që inaugurojmë sot në Maqellarë dhe në Shupenzë. Kemi nisur programin kombëtar të rehabilitimit të 300 qendrave shëndetësore në 4 vite dhe këtë vit do të rehabilitojmë 80 qendra të kujdesit parësor nga veriu në jug të vendit”, tha Manastirliu.
Sipas MSHMS, qendra shëndetësore e Maqellarës ofron shërbim shëndetësor 24 orë për rreth 14 mijë banorë. Ndërsa ajo e Shupenzës iu vjen në ndihmë jo vetëm 7 mijë banorëve të Shupenzës, por mbulon shërbimin edhe në zona të thella të Bulqizës për rreth 15 mijë banorë.
Në qarkun e Dibrës janë rehabilituar katër qendra shëndetësore në Maqellarë, Kastriot, Shupenzë dhe Komsi me mbështetjen e projektit “Shëndet për të gjithë” të qeverisë zvicerane me vlerë 50 milionë lekë.
Ndërkohë, krahas realizimit dhe pajisjeve të qendrave shëndetësore, sipas MSHMS edhe mjekët e familjes në këtë qark janë trajnuar dhe pajisur me “çantën e doktorit”, që përmban 17 instrumente mjekësore.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.