2 rastet me koronavirus në Tiranë, Manastirliu jep detaje: Djali erdhi nga Firence në rrugë tokësore. Babai, rast i konfirmuar si kontakt i ngushtë
Pas konfirmimit të dy rasteve të prekura më koronavirus, ministrja e Shëndetësisë Ogerta Manastirliu ka dhënë detaje të asaj çfarë ka ndodhur. Në fjalën e mbajtur në mbledhjen e jashtëzakonshme të qeverisë, Manastirliu bëri apel për qetësi dhe për bashkëpunim.
“Janë konfirmuar dy rastet e para në Shqipëri. Bëhet fjalë për dy qytetarë banues në Tiranë. Njëri është rast i importuar i cili ka udhëtuar nga Firence në Shqipëri dhe ka hyrë nga Hani i Hotit me 26 shkurt ndërkohë që babai është rasti i konfirmuar si kontakt i ngushtë.
Është kontaktuar urgjenca kombëtare 127 dhe menjëherë sipas protokolleve janë marrë mostrat djalit dhe babait që kanë pasur shenja klinike. Janë dërguar në laboratorin e virologjisë dhe kanë rezultuar pozitive. Menjëherë pas daljes së rezultateve ekipi i epidemiologëve i ISHP dhe urgjenca kombëtare kanë kryer identifikimin, izolimin e kontakteve të ngushta gjatë gjithë natës. Kanë marrë mostrat e kontakteve për analizë dhe kontaktet e ngushta janë izoluar tashmë.
Ndërsa të dy qytetarët, babai dhe i biri janë po marrin shërbim pranë shërbimin infektiv në QSUT. Dua të bëj disa thirrje, shfrytëzoj rastin, për qetësi. Ekipet tona të urgjencës kombëtare janë në gatishmëri të plotë. Mjekët dhe infermierët janë në ballë të kësaj situate duke iu përgjigjur të gjitha rasteve sipas skenareve të planifikuuara. Kam një apel për personat që kontaktohen nga ekipet tona që të bashkëpunojnë për të mirën e shëndetit të tyre dhe të qytetarëve të tjerë. Apel për qendrime racionale, nuk ka arsye për panik” tha Manastirliu.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.