20.9 mld lekë nga taksimi i pagave – Aksioni i formalizimit dhe deklarimi real, pritet rritje e të ardhurave
Puna në të zezë dhe mosdeklarimi real i pagave, duke privuar punonjësit nga përfitimet që vijnë përmes kontributeve shoqërore dhe shëndetësore, është një problematikë e hershme e tregut të punës në vend.
Së fundmi Drejtoria e Përgjithshme e Tatimeve ka identifikuar dy sektorët kryesorë ku abuzohet më shumë. Konkretisht bëhet fjalë për profesionet që ofrojnë shërbime në fushën e turizmit, si dhe në atë të Teknologjisë së Informacionit, të cilat janë vënë në qendër të vëmendjes nga administratat tatimore, për të deklaruar pagat reale.
Ndërkaq, deklarimi real i pagave do të ndikojë drejtpërsëdrejti edhe në rritjen e të ardhurave në buxhetin e shtetit nga tatimi i të ardhurave personale, që për 7-mujorin e 2018-së janë realizuar në masën 56 për qind.
Kështu, sipas treguesve fiskale të konsoliduar të Ministrisë së Financave, për periudhën Janar-Korrik 2018 janë mbledhur rreth 20.9 miliardë lekë vetëm nga taksimi i pagave të punonjësve, nga 37.3 miliardë lekë që është plani vjetor.
Kështu në pjesën e mbetur të vitit, Ministria e Financave duhet të mbledhë edhe 16.4 miliardë lekë të tjera. Por me aksionin e fundit të administratës tatimore, e cila formalizoi rreth 2792 punonjës vetëm gjatë periudhës 28 maj -12 gusht 2018 si dhe aksionin në deklarimit real të pagave, pritet që shifra e të ardhurave të rritet ndjeshëm.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.