20 degët më të kërkuara nga maturantët – Në krye administrim biznesi dhe juridiku
Ministrja e Arsimit, Sportit dhe Rinisë, Lindita Nikolla ka bërë publik një pjesë nga raporti mbi arsimin e lartë për vitin akademik 2018-2018. Në të listohen programet e studimit që kanë rezultuar më të kërkuara nga maturantët në të dyja raundet e aplikimit në ciklin e parë.
Listën me 20 programe e kryeson dega “Administrim-Biznes” me 8734 kërkesa, ndjekur nga “Drejtësia” me 8319 kërkesa. Po ashtu pak mbi 8 mijë aplikime ka edhe për degën “Punë Sociale”.
Në bandën e mbi 7 mijë kërkesave ndodhen degët Psikologji dhe Shkenca Politike, me përkatësisht rreth 7400 dhe 7200 aplikime në dy raunde.
Gjuha angleze renditet gjithashtu mes programeve më të kërkuara me 6762 kërkesa, ndjekur nga Financa me 6310 kërkesa dhe Gazetaria me 5670 kërkesa.
Dhjetëshen e programeve më të kërkuara të studimit e mbyllin degët “Administrim dhe Politika Sociale” dhe “Ekonomiks”.
Ndërkohë, programet e tjera më të kërkuara radhitur sipas kërkesave janë: Sociologji, Informatikë Ekonomike, Teknologji Informacioni dhe Komunikimi, Gjuhë-Letërsi, Informatikë, Inxhinieri Telekomunikacioni, Inxhiniere Informatike, Financë-Kontabilitet, Mjekësi e Përgjithshme dhe Stomatologji.
Nga 20 programet e mësipërme bie në sy që 5 programe i përkasin fushës së ekonomisë dhe financave, 4 programe janë të lidhura me informatikën dhe 7 programe klasifikohen brenda fushës sociale.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.