20 mijë fermerë “dalin në dritë” – Formalizim në 3 muaj, interes të lartë për fondet në bujqësi!
Afro 20 mijë fermerë janë pajisur me NIPT rishtazi, nga 1 Janari deri më 30 Mars 2022, me qëllimin e vetëm për të qenë përfitues të subvencioneve në bujqësi, si kriteri kryesor i vendosur Agjencia për Zhvillimin Bujqësor dhe Rural.
Sipas të dhënave më të fundit të Drejtorisë së Përgjithshme të Tatimeve, të përpunuara nga TV SCAN aktualisht janë 82.733 fermerë të formalizuar që kanë një NIPT, ndërsa që viti 2021 u mbyll me 62.986 fermerë të pajisur me nipt. Ndërkohë që 30 marsi është edhe afati i fundit i aplikimit për femerët për të përfituar nga fond i subvencioneve i vënë në dispozicion gjatë këtij vitit dhe interesi duket se ka qenë tejet i lartë karasimisht me vitet e mëparshme.
Qarqet që kanë pasur fluksin më të lartë të pajisjes me nipt janë Fieri, Korça, Elbasani, Berati dhe Vlora, ndërsa ma pak fermerë të regjistruar rezultojnë në Lezhë dhe në Sarandë. Megjithatë, po të marrim parasysh se në total janë 354 mijë fermerë, rezulton se vetëm 23.3 për qind prej tyre janë të formalizuar dhe që kanë akses në fondet për bujqësinë, si në skemat shtetërore edhe në ato të Bashkimit Europian që aplikohen përmes programit IPARD, duke bërë që 76.6 për qind të jenë informalë.
Më 25 Shkurt, Agjencia Për Zhvillimin Bujqësor dhe Rural ka hapur aplikimet për 13 skema mbështetëse përmes Skemës Kombëtare, ku fond i vënë në dispozicion në total është 3.7 miliardë lekë, nga të cilat rreth 1.4 miliardë lekë do të shkojnë për naftën falas në bujqësi dhe pjesa tjetër do të përdoret në mbështetje të prodhimit, blegtorisë, bletarisë dhe sektorit të peshkimit. Fermerët e pajisur me nipt nuk kanë asnjë detyrim tatimor për të paguar.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.