200 emigrantë në kufirin Serbi-Hungari – Në tentativë për të hyrë në vendet e BE-së (FOTOT)

Rreth 200 emigrantë, përfshirë fëmijë, u mblodhën të enjten në kufirin e Serbisë me Hungarinë për të kërkuar që t’iu lejohej hyrja në vendet e Bashkimit Europian.

Duke përballuar motin e acartë të natës dhe erërat e forta, emigrantët kanë ngritur kampin në vendkalimin kufitar Kelebija, duke bllokuar trafikun. Të mbështjellë me batanije ose çanta -gjumi, shumë emigrantë kanë qëndruar të shtrirë ose ulur në tokë, duke mbajtur afër sendet e tyre personale.

Në këtë periudhë mijëra emigrantë, të cilët po ikin nga lufta dhe varfëria nga vendet e tyre, kanë ngecur në Ballkan ndërsa kërkojnë të transferohen në kombet më të zhvilluara në Europën Perëndimore. Hungaria ka shtuar edhe dy rreshta të tjerë gardhe teli në kufi për të parandaluar hyrjen e tyre.

Shumica e emigrantëve në Serbi kalojnë muaj të tërë në kampe shtetërore dhe përpiqen të kalojnë kufijtë disa herë. Ata shpesh mbështeten te kontrabandistët e njerëzve për t’i ndihmuar ata të kalojnë në Hungari ose një shtet tjetër anëtar të BE, në Kroaci.

Shumica e emigrantëve vijnë nga vende të tilla si Siria, Iraku apo Afganistani. Qindra mijëra kanë kaluar nëpërmjet Ballkanit në 2015-2016 duke ikur më pas në Europë. (AP)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.