2018, ndërtimi në vështirësi – 20 kompani “zhduken” nga adresat zyrtare, kërkohen nga gjykatat
Viti 2018 ka nisur me të dhëna aspak pozitive për sektorin e ndërtimit. Të paktën 20 kompani ndërtimi rezultojnë të “zhdukura” nga adresat zyrtare gjatë ditëve të para të vitit.
SCAN ka zbardhur mbi 20 shpallje publike të bëra nga ana e gjykatave, për të njoftuar këto kompani se janë të përfshirë në padi gjyqësore.
Gjykatat u drejtohen shpalljeve publike në rastet kur palët nuk kanë më një adresë zyrtare, ku t’u komunikohet thirrja për t’u paraqitur në proces.
Numri i lartë i kompanive të ndërtimit që kanë pushuar aktivitetin konfirmon shifrat e dobëta me të cilat vijon të përballet ky sektor.
Sipas të dhënave zyrtare të INSTAT, për tremujorin e tretë të vitit të shkuar, aktiviteti i ndërtimit pati rritje me 7,64 %, por i influencuar kryesisht nga investimet private të lidhura me TAP, si edhe nga kompanitë që bëjnë vepra publike.
Ndërkaq Aktiviteti i Pasurive të Paluajtshme për këtë tremujor ka shënuar një rënie prej 0,36 %.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.