2019, bizneset rritën shitjet 18.2 mld euro – Anketa/ Bie numri i ndërmarrjeve aktive, “të mëdhenjtë” kryesojnë tregun

Për të tretin vit radhazi, numri i ndërmarrjeve aktive gjatë 2019-ës ka pësuar rënie, ndërsa në trend pozitiv kanë ecur shitjet dhe investimet e sipërmarrjes. Sipas të dhënave të Anketës Strukturore të Ndërmarrjeve, të publikuar nga INSTAT, biznesi qarkulloi 18.2 miliardë euro vitin që lam pas, duke shënuar një rritje prej 3.7 për qind krahasuar me 2018-ën. Investimet u regjistruan në 1.9 miliardë euro, me rritje prej 1.4 për qind, ndërsa numri i ndërmarrjeve që operuan ra me 3.1 për qind duke u regjistruar në afro 104 mijë.

Por pavarësisht kësaj, sipas të dhënave, rezulton që numri i të punësuarve të jetë rritur me 2.9 për qind.  Ekonomia shqiptare vijon të dominohet nga sektori i shërbimeve, i cili zë 67 për qind të totalit. Konkretisht, sektori i tregtisë zë peshën më të lartë të shitjeve neto me 46,1 %, i ndjekur nga sektori i industrisë përpunuese me 11,8 %. Ndërsa, sektorët me peshën më të vogël janë sektori i akomodimit dhe restoranteve (3,1 %) dhe sektori i industrisë nxjerrëse (3,6 %).

Nga vrojtimi rezulton se ndërmarrjet me 50 e më shumë të punësuar, edhe pse zënë peshën më të vogël në numër, në vetëm 1429, japin kontributin kryesor në ekonomi, duke realizuar 46,8 % të shitjeve neto, 41,6 % të të punësuarve gjithsej dhe 56,3 % të investimeve. Në të kundërt, bizneset e vogla, edhe pse zënë 85.8 të numrit total, qarkullojnë vetëm 13.4 për qind të xhiros totale.

Shifrat tregojnë se kontributi i kësaj kategorie në ekonomi vijon të mbetet i brishtë. Bizneset e vogla me 1- 4 punonjës, pësuan rënie sa i takon peshës në punësim, në 27,7 për qind nga 29.4 për qind që ishte në 2018-ën.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.