2020 rrit krimin mjedisor. Organizatat mjedisore thirrje për veprim, shumë pak hetime e dënime nga Prokuroria
Sipas të dhënave të marra nga Prokuroria e Përgjithshme mbi rastet e veprave penale të krimit mjedisor në Shqipëri, për një periudhë 9 mujore, vihet re që viti 2020 ka shënuar rritje të numrit të veprave të krimit mjedisor, me 254 raste të trajtuara dhe 146 të pakonsideruara, ndërkohë që ndëshkueshmëria mbetet në nivele shumë të ulëta me vetëm gati 5% të rasteve të referuara në prokurori. Nga totali i rasteve të trajtuara, 39 raste të veprave penale rezultojnë të dënuara, ku 36 prej këtyre rasteve lidhen me Nenin 205 Prerja e paligjshme e pyjeve (23 raste) dhe Nenin 201 Ndotja e ajrit (13 raste).
Të dhënat vijnë nga nga Grupi Këshillimor kundër Krimit Mjedisor (GKKM), i cili përmes një deklarate për shtyp shprehim shqetësimin tonë lidhur me rritjen e veprave të krimit mjedisor dhe të dëmtimit të mjedisit në përgjithësi në vendin tonë si: prerja e paligjshme e pyjeve, ndotja e ujërave apo dëmtimi i faunës së egër. Sipas raportimeve të organizatave mjedisore, policisë dhe mediave në vend, krimi mjedisor në Shqipëri është rritur gjatë vitit 2020, Kjo, shoqëruar me një nivel të ulët të ndëshkueshmërisë së krimeve mjedisore dhe me mungesën e të dhënave të sakta dhe gjithëpërfshirëse, tregon që vendit ende i mungon një sistem i organizuar raportimi, parandalimi dhe ndjekje e krimeve të tilla.
Nisur nga analiza e shifrave si dhe e llojeve të figurave të veprave penale, shtrohet pyetja nëse këto institucione të ligjit nuk e njohin sa duhet krimin mjedisor dhe rrjedhimisht nuk duan që t’i cilësojnë këto vepra penale si të tilla. Ndërkohë që ka shumë raste të raportuara pranë Ministrisë së Turizmit dhe Mjedisit nga organizatat mjedisore që punojnë në fushën e mbrojtjes së faunës dhe natyrës që dëshmojnë të kundërtën në realitet.
Për më tepër, muajt e fundit vihet re një refuzim në rritje në dhënien e informacionit mjedisor prej autoriteteve përgjegjëse për gjendjen e mjedisit. Gjithashtu ne vlerësojmë se duhet të rritet pro-aktivizimi i Komisionerit për të Drejtën e Informimit dhe Mbrojtjen e të Dhënave Personale, një institucion shumë i rëndësishëm i pavarur, detyra e të cilit është nxitja dhe vendosja para përgjegjësisë administrative të institucioneve publike që cenojnë transparencën dhe qasjen në informacionin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.