2020, vit i vështirë për siguruesit e pronave – Raporti për rajonin: Kompanitë nuk u përballën me humbje të rënda, u rrit ndërgjegjësimi
Viti 2020, “Sezon i vështirë për siguruesit e pronës në vendet e Evropës Qendrore dhe Juglindore”. Është kjo përmbledhja që I bëhet ecurisë së tregut të sigurimeve në editorialin e publikimit professional të Xprimm me titull “Sigurimi i pronës 2019-gjashtëmujori i parë 2020” për vendet e Evropës Qendrore dhe Juglindore.
Publikimi përmbledh të dhëna statistikore për ecurinë e sigurimit të pronës në Shqipëri, Bosnje-Hercegovinë, Bullgari, Kroaci, Republika Çeke, Estoni, Hungari, Kosovë, Letoni, Lituani, Maqedonia e Veriut, Mali i Zi, Poloni, Rumani, Serbi, Republika Sllovake dhe Sllovenia.
Në editorialin e këtij publikimi, kjo periudhë cilësohet si “Sezon I vështirë për siguruesit e pronës në vendet e Evropës Qendrore dhe Juglindore”.
Mbështetur edhe në të dhënat tabelare statistikore, evidentohet se megjithëse gjatë vitit 2019 dhe gjysmës së parë të vitit 2020, kishte disa ngjarje të mëdha që lidheshin me katastrofa natyrore si tërmetet dhe përmbytjet, industria e sigurimeve, nuk regjistroi humbje shumë të mëdha, kryesisht për shkak të mbulimit të dobët të rreziqeve nga fatkeqësitë natyrore (NatCat) në vendet e prekura nga këto ngjarje. Megjithatë, thuhet në editorialin e publikimit, në disa raste, eksperiencat dramatike të këtyre ngjarjeve kanë rritur ndërgjegjësimin dhe kanë nxitur rritjen e sigurimit të shtëpive, ndër të tjera edhe nga katastrofat natyrore.
Siç është edhe rasti I Shqipërisë, e cila u gjend në epiqendrën e tërmetit shkatërrues të 26 nëntorit 2019, I cili duket se u ka dhënë një mësim të mirë qytetarëve e bizneseve shqiptare lidhur me sigurimin e pronave. Në raportin për dy muajt e parë të këtij viti, Autoriteti i Mbikëqyrjes Financiare bën me dije se sigurimet e pronës nga zjarri e fatkeqësitë natyrore janë dyfishuar. Në portofolin sigurimi nga Zjarri dhe Forcat e Natyrës, gjatë periudhës janar-shkurt 2021, thekson AMF, vihet re një rritje prej 106.44% e vëllimit të primeve të shkruara bruto të këtij portofoli dhe një rritje me 3.94% e numrit të kontratave të sigurimit, krahasuar me periudhën janar-shkurt 2020.
Rritja e këtij portofoli ka balancuar edhe rënien e treguesve të tjerë të tregut të sigurimeve, I cili në total ka shënuar një numër më të ulët kontratash krahasuar me dy muajt e parë të vitit 2020. Të ardhurat nga primet e shkruara bruto të sigurimit për periudhën janar-shkurt 2021 kapën vlerën mbi 2,824 milionë lekë, ose 6.31% më shumë se në periudhën janar-shkurt 2020. Ndërkohë që numri i kontratave të sigurimit të lidhura arriti në 140,013 me një ulje prej 27.01% krahasuar me periudhën janar-shkurt 2020.
Tregu vazhdoi të mbetet sërish i orientuar tek sigurimet e Jo-Jetës, të cilat sollën 93.63% të vëllimit të përgjithshëm të primeve, duke i lënë përkatësisht sigurimet e Jetës me 6.37%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 43.89% dhe primet e shkruara bruto të sigurimit të detyrueshëm zënë 56.11% të totalit të tregut.
Gjatë periudhës janar-shkurt 2021, dëmet e paguara bruto në tregun e sigurimeve, arritën në rreth 1,396 milionë lekë, ose 20.16% më pak se në periudhën janar-shkurt 2020.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.