2022, kompanitë paguan më pak dëmshpërblime – AMF: Dëmet paguara për periudhën janar-prill 21 milionë dollarë

Në katër muajt e parë të këtij viti, kompanitë e sigurimit kanë ulur ndjeshëm totalin e dëmeve të paguara në favor të klientëve. Autoriteti i Mbikëqyrjes Financiare raporton se gjatë periudhës janar-prill 2022, dëmet e paguara bruto në tregun e sigurimeve, arritën në rreth 2,1 miliardë lekë, ose 14.54% më pak se në të njëjtën periudhë të një viti më parë.

Të dhënat tregojnë se volume i dëmeve të paguara nga kompanitë është tkurrur në segmentet që kanë të bëjnë me sigurimet e pronës. Sipas AMF, Dëmet e paguara bruto në sigurimin motorik për periudhën janar-prill 2022 kapën vlerën 1,3 miliardë lekë, afërisht 13 milionë dollar, duke pësuar një rritje me rreth 1.03% krahasuar me të njëjtën periudhë të një viti më parë.

Numri i dëmeve të paguara gjatë Janar – Prillit 2022 është rritur me 1,931  dhe arriti shifrën 18,907, nga të cilat 18,115 dëme janë paguar nga shoqëritë e sigurimit të Jo-Jetës dhe vetëm 792 nga shoqëritë e sigurimit të Jetës.

Primet e sigurimit të detyrueshëm motorik, gjatë periudhës janar-prill 2022 arritën rreth 3,334 milionë lekë, ose 13.53 % më shumë se në periudhën janar-prill 2021.

Produkti MTPL e brendshme, në periudhën janar-prill 2022, pati një rritje prej 8.44% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 7.03% krahasuar me të njëjtën periudhë të një viti më parë.

Produkti Karton Jeshil në periudhën janar-prill 2022 pati një rritje prej 53.67% të vëllimit të primeve të shkruara bruto. Kjo u shoqërua nga një rritje të numrit të kontratave prej 70.63% krahasuar me periudhën janar-prill 2021.

Produkti Sigurim Kufitar, në periudhën janar-prill 2022, pati një rritje 6.6% të vëllimit të primeve të shkruara bruto krahasuar me periudhën janar-prill 2021. Edhe numri i kontratave u rrit me 7.77%.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.