2022, qindra pronarë drejt gjykatave – Vetëm gjatë prillit janë ngritur kundër ATP 49 padi në gjykata

Ndërsa nuk funksionon për shkak të bllokimit nga Gjykata Kushtetuese, por edhe në një kohë kur drejtuesit e saj kryesorë janë dërguar për Kallëzim penal në Spak, Agjencia e Trajtimit të Pronave po përballet gjatë pjesës së parë të vitit me flukse të lartë padish gjyqësore.

Sipas të dhënave të saj zyrtare, 49 padi kundër saj janë ngritur nga pronarët nëpër gjykata vetëm gjatë muajit prill. Flukse të larta padish janë shënuar edhe gjatë muajve të mëparshëm: 29 në mars, 56 në shkurt dhe 31 në janar, duke e çuar kështu në 165 numrin total të ankimimeve në rrugë gjyqësore të vendimeve të saj.

Flukset janë pak a shumë të njëjta me një vit më parë, kur sektori i përfaqësimit ligjor ka ankimuar mbi 800 vendime, ndërkohë që planifikonte të mbyllte 1 mijë. Sipas të dhënave zyrtare të vetë Agjencisë, gjatë vitit të shkuar Sektori i përfaqësimit ligjor ka mbyllur 844 “Vendime të Ankimuara” në të gjitha gjykatat e vendit, ndërkohë që po në këtë periudhë janë depozituar  732 padi në të gjitha gjykatat e vendit, në gjykatat e rretheve, në gjykatat e apelit, në gjykatat administrative të shkallës së parë dhe në apelin administrative.

Ndërkohë që ndryshimet e sapomiratuara nga Ministria e Drejtësisë në Ligjin e Pronave, pritet të sjellin rritje të mëtejshme të padive ndaj Agjencisë, për shkak se ato reduktojnë edhe më tej vlerat e kompensimeve që përfitojnë pronarët. Ndryshimet në fjalë erdhën si pasojë e shfuqizimit të dy neneve të Ligjit për Trajtimin e Pronës nga Gjykata Kushtetuese në shkurt të vitit 2021, dhe një detyrimi nga Gjykata e Strasburgut që pronarët të kompensohen me jo më pak se 10% e vlerës reale të pronës.

Ndërkohë që shoqatat e pronarëve paralajmërojnë se ndryshimet e sapomiratuara nga Ministria e Drejtësisë e ulin vlerën e kompensimit nën kufirin prej 10% të vendosur nga Strasburgu, shkak për të cilin do ta dërgojnë përsëri Ligjin në Kushtetuese.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.