2022, shqiptarët sigurojnë më shumë shëndetin – AMF: Portofolet e Aksidenteve dhe mrojtja nga sëmundjet rritje 26.1% krahasuar me 2021

Ndërsa tregu i sigurimeve për këtë fillim viti ka shënuar një tkurrje na raport me një vit më parë, portofoli i aksidenteve dhe shëndetit është ndër të paktët që kanë regjistruar rritje. Autoriteti i Mbikqyrjes financiare raporton rritje të arkëtimeve por edhe të numrit të kontratave të nënshkruara nga kompanitë e sigurimeve, qoftë në portofolin e jetës, ashtu edhe në atë të shëndetit. “Të ardhurat nga sigurimet e Aksidenteve dhe Shëndetit, gjatë periudhës janar 2022, arritën në rreth 137 milionë lekë, duke shënuar një rritje prej 26.1% në krahasim me periudhën janar 2021”, thekson në raport Autoriteti i Mbikqyrjes Financiare. Ndërkaq, Primet nga sigurimet e Jetës gjatë periudhës janar 2022, arritën rreth 105 milionë lekë, ose 11.54% më shumë se në të njëjtën periudhë të një viti më parë.

Ndërkohë që po t’i hedhim një vështrim tregut në tërësi, rezulton se Kompanitë e sigurimeve e kanë nisur vitin 2022 me rënie të arkëtimeve, pavarësisht numri i kontratave ka shënuar rritje. Rënie kanë shënuar edhe dëmet e paguara prej tyre krahasuar me janarin e vitit 2021. Të ardhurat nga primet e shkruara bruto të sigurimit për periudhën janar 2022 kapën vlerën 1,4 miliardë lekë, rreth 14 milionë dollarë, ose 5.16% më pak se në janar 2021. Gjatë periudhës janar 2022, numri i kontratave të sigurimit të lidhura arriti në 83,798 me një rritje prej 17.72% krahasuar me të njëjtën periudhë të një viti më parë.

Tregu mbeti përsëri i orientuar tek sigurimet e Jo-Jetës, të cilat sollën 92.55% të vëllimit të përgjithshëm të primeve, ndërsa sigurimet e Jetës kanë 7.4%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 39.68% dhe primet e shkruara bruto të sigurimit të detyrueshëm zënë 60.32% të totalit të tregut.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.