2022, viti i vaksinimit të popullsisë në botë – Instituti i Vaksinave: Vendet e varfra duhet të kenë më shumë akses

Nëse 2021 ishte viti i zhvillimit të vaksinave, 2022 do të jetë viti i vaksinimit masiv dhe i dozave nxitëse, sipas Institutit Ndërkombëtar të Vaksinave. “2022 do të jetë viti i vaksiminit, si për ata që e marrin dozën për herë të parë ashtu edhe për ata që marrin dozat mbështetëse”, deklaroi Jerome Kim, drejtor i përgjithshëm i Institutit Ndërkombëtar të Vaksinave, që është një organizatë e pavarur jofitim prurëse, e përkushtuar në zhvillimin e vaksinave për vendet e varfëra. “Shpresojmë gjithashtu, se do të jetë viti i zhvillimit të ilaçeve kundër Covid-19, për ta bërë trajtimin më efektiv”, shtoi Kim.

Në fund të dhjetorit, Administrata e Ushqimeve dhe Barnave në SHBA autorizoi dy pilula antivirale për përdorim emergjent në trajtimin e Covid-19, duke shënuar një moment historik në bejetën kundër koronavirusit, që ka vrarë më shumë se 5.4 milionë njerëz në të gjithë botën që nga viti 2019. Javën e kaluar, numri i rasteve me Covid-19 në SHBA arriti rekordin më të lartë që kur filloi pandemia, me një mesatare javore prej 265 mijë raste në ditë, duke kaluar mesataren javore prej 252 mijë raste në ditë në janar të vitit 2021.

Sipas Kim, një ndër prioritetet kryesore të vitit 2022 duhet të jetë ofrimi i vaksinave për njerëzit që kanë më shumë nevojë, sidomos në vendet e varfëra që kanë akses të kufizuar. Rreth 58.3% e popullsisë në botë e ka marrë të paktën një dozë të vaksinës kundër Covid-19, por vetëm 8.5% e njerëzve në vendet me të ardhura të ulëta kanë marrë të paktën një dozë. Për këtë arsye, Instituti Ndërkombëtar i Vaksinave bën thirrje që vendet e pasura duhet të bëjnë më shumë për të adresuar këtë ndarje të madhe mbi të drejtën për tu vaksinuar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.