23 persona humbin jetën pas vaksinimit – Norvegji, autoritetet: Mund të jetë edhe rastësi. Reagon Pfizer
23 persona kanë humbur jetën pasi kanë marrë vaksinën e Pfizer në Norvegji, kryesisht të moshuar. Por, sipas autoriteteve kjo mund të jetë edhe një rastësi.
Doktorët në Norvegji janë urdhëruar të bëjnë vlerësime më të hollësishme tek pacientët e moshuar, përpara se ata të marrin vaksinën e Pfizer dhe BioNTec, pasi 23 pacientë kanë gjetur vdekjen pas marrjes së vaksinës. “Mund të jetë një rastësi, por nuk jemi të sigurt”, deklaroi Steinar Madsen, drejtori mjekësor i Agjencisë Norvegjeze të Barnave. “Nuk ka ndonjë lidhje të caktuar midis këtyre vdekjeve dhe vaksinës.
Ajo që themi është se nëse keni pacientë shumë të dobët, shumë të sëmurë dhe që kanë një jetëgjatësi të shkurtër, duhet të bëni një vlerësim shtesë të përshtatshmërisë së vaksinimit të këtyre pacientëve”, u shpreh Madsen. Në raportin e saj, Agjencia Norvegjeze e Barnave tha se një total prej 29 personash kishin pasur efekte anësore nga vaksinimi COVID-19, 21 gra dhe 8 burra. Në shtetin nordik më shumë se 20.000 persona janë vaksinuar në javët e fundit. Në një deklaratë, kompania Pfizer tha se, së bashku me BioNTech janë në dijeni të vdekjeve të raportuara pas marrjes së vaksinës dhe po punojnë me autoritetet në Norvegji për të marrë të gjithë informacionin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.