24 orë furnizim dhe ujë 100% i filtruar. Kryeministri Rama dhe Kryetari Veliaj prezantojnë projektin në Bovillë
Kryeministri Edi Rama dhe Kryetari i Bashkisë Erjon Veliaj kanë qenë në Bovillë ditën e sotme ku kanë prezantuar nismën më të fundit, që synon t’i sjellë kryeqytetit 24 orë ujë, njëkohësisht edhe të pijshëm.
Një premtim ky që prej shumë vitesh pritet nga banorët e kryeqytetit.
Kryetari Veliaj u shpreh se do punohet që filtrimi i ujit të bëhet i plotë për të gjithë banorët, ndërsa theksoi se problematikë do jenë banorët që kanë tuba të vjetëruar:
“Do ta çojmë në 100% filtrimin e ujit në Tiranë. E di që ka shumë veta që thonë se u rrit çmimi, por le ta çmitiozojmë, çmimi tani është 65 lekë. Duhet të bëjmë një punë kapilar, nëse nuk bëjmë dyfishimin e ritmit, për të ruajtur dhe rikuperuar humbjet nuk do t’ia dalim. Presim të fitojmë kampionatin tonë të tretë. Është hera e parë që kemi një shërbim 24 orë në 24 për klientin, është linçuar një numër zyrtar që regjistrohet çdo gjë. Do të ketë probleme me ata që tubat i kane që në kohën e xhaxhit”,tha Veliaj.
Ndërsa, Kryeministri Edi Rama e cilësoi investimin e bërë te Bovilla për furnizimin me 24 orë ujë të 62 % të Tiranës një investim madhor që u bë në bashkëpunim me Italinë. Rama tha se aktualisht janë 55 kantiere ndërtimi në të gjithë vendin ku po ndërtohet ujësjellësi, ndërsa tha se këto projekte do të ndryshojnë jetën e banorëve në lidhje me furnizimin me ujë. Rama tha se kur erdhi në qeveri para 7 vitesh kishte një mesatare të furnizimit me ujë 7 orë të ditë dhe sot ajo është 16 orë. Falë këtij projekti tha Rama 62 % do të kenë 4 orë ujë të pijshëm në banesat e tyre.
Ne sot jemi në kushtet kur po investojmë në 55 zona urbane, përveç 7 zona,që deri në 2013 numëroheshin si zona plotësisht të furnizuara me ujë. Sot kemi në Shqipëri 55 kantiere të madha që do të transformojnë jetën e banorëve në lidhje me furnizimin me ujë dhe do të mbyllim në të gjithë zonat përjashtuar 7 zonat, një plagë shumë të madhe. Sot mund t’i themi qytetarëve të Tiranës që me të drejtë kanë akumuluar mërzi dhe inat për shkak të furnizimit me ujë, që faktikisht nga sot në të gjithë ato pikat ku kishte probleme me ujë do të kenë 24 orë. Sot mesatarja e furnizimit më ujë është 16 orë. 250 mijë banorë përfitojnë nga ky investim. Faleminderit të gjithë atyre që na ndihmuan, punuan, nuk ka qenë asnjëherë një ndjenjë e mirë të ndesheshim me njerëzit që nuk kishin furnizim të madh as tek Myslym Shyri apo Muhamed Gjolesha, rrugën që kam lindur e rritur vetë e jo më tek zonat e tjera”, tha Rama.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.