24 orë ujë vetëm në bregdet! – Buxheti 3-vjeçar/ Në 2022-in, furnizim me ujë 16 orë në ditë
Qeveria parashikon që me investimet në 3-vjeçarin e ardhshëm të mundësojnë furnizim 24 orë me ujë dhe shërbime për zonat bregdetare. Referuar buxhetit afatmesëm 2020-2022, në 3 vitet e ardhshëm është planifikuar një rritje e lehtë e shpenzimeve për këtë sektor, duke shkuar në 11.98 mld në vitin 2022 nga 10.38 mld lekë që është në vitin 2019.
Ndërkohë që, bazuar në programin e ujësjellës-kanalizime, ku qeveria është bazuar për hartimin e tij, specifikohet se mbulimi me shërbimin e furnizimit me ujë për të gjithë popullatën, parashikohet të arrihet në vitin 2027. Referuar dokumentit, në fund të 3-vjeçarit, synohet vetëm një rritje e mesatares të furnizimit me ujë të pijshëm në rang vendi nga 13 orë që është aktualisht, në 16 orë në ditë në vitin 2022.
Zgjerimi i aksesit dhe cilësisë së shërbimit të ujit të pijshëm konsiderohet në dokument si një nga prioritetet e Ministrisë së Infrastrukturës dhe Energjisë. Ndërkohë që, kjo pritet të arrihet edhe përmes përmirësimit të menaxhimit të shoqërive të ujësjellës-kanalizimeve, që në shumë qytete operojnë negativisht. Për këtë arsye, këtë vit është ndryshuar 2 herë edhe metodologjia e subvencionimit nga ana e buxhetit të shtetit, ndërkohë që autoritetet kanë kërkuar publikisht që këto shoqëri të mos përdorin rritjen e tarifave, si formë për të rritur të ardhurat.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.