3.3% më shumë aplikime kombëtare për marka në 2017 – DPPI: Në rritje edhe numri i atyre që kërkojnë shtrirje ndërkombëtare

Viti 2017 shënoi një rritje të numrit të aplikimeve për regjistrim marke nga subjektet shqiptare, të cilat arritën në 684, 3.3% më shumë së në vitin 2016. Sipas Drejtorisë së Përgjithshme të Pronësisë Industriale, kjo rritje e konsiderueshme ka ardhur si rezultat i fushatës ndërgjegjësuese të ndërmarrë prej saj.

Ndërkohë, edhe subjektet shqiptare arritën të mbrojnë markat e tyre me një aplikim të vetëm në disa nga vendet e huaja përmes Marrëveshjes së Madridit, e cila konsiston në regjistrimin ndërkombëtar të markave.

Kështu, referuar të dhënave të DPPI-së, gjatë vitit të kaluar janë depozituar 2732 aplikime nga Sistemi i Madridit, duke shënuar një rritje me 13.8% krahasuar me vitin 2016.

Ndërsa, është rritur me 8.% edhe numri i subjekteve shqiptare që kanë kërkuar shtrirje ndërkombëtare, çka nënkupton një shtim të numrit të atyre që eksportojnë produktet e tyre në tregjet e tyre.

Sa i takon numrit të aplikimeve për marka nga shtetet e tjera për gjatë vitit 2017, Shtetet e Bashkuara të Amerikës kryesojnë listën me 127 aplikime. Në vendin e dytë renditet Kosova, si një ndër 10 shtetet me numrin më të lartë të aplikimeve me 42 të tilla, pasur nga Britania e Madhe me 41.

E pozicionuar në vendin e katërt, Turqia numëron 30 aplikime, ndjekur nga Zvicra me 12, Gjermania dhe Koreja e Jugut respektivisht me nga 13 aplikime si dhe Italia me 12 të tilla. Ndërkohë, Kroacia dhe Kina janë dy nga dhjetë shtetet e listuar të cilat numërojnë nga 10 aplikime për marka secila në vendin tonë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.