3.4 mln dollarë për vaditjen – Çuçi: Investimi përfundon në kohë, përfitime për fermerët
Investimi i financuar nga Banka Botërore që arrin vlerën e 3.4 milionë dollarëve për rehabilitimin e kanaleve vaditëse në zonën e Lushnjes pritet të përfundojë brenda afatit në mënyrë që të zgjidhjet problematika për fermerët.
Ministri i Bujqësisë Bledi Çuçi, i shoqëruar nga zv.Kryeministri, Erion Braçe dhe njëherazi deputeti i asaj zone inspektoi punimet, ku theksoi se nuk do të tolerohen vonesat. ‘Ka kaluar më shumë se gjysma e kohës sipas kontratës dhe është realizuar rreth 17% e punimeve.
Ju duhet të shtoni kapacitetet me mjete dhe njerëz, si dhe të rishikoni grafikun e kryerjes së punimeve. Investimi duhet të përfundojë në muajin maj. Deri atëherë unë do të jem sërish këtu për të parë ecurinë e punës dhe nuk do të tolerohen vonesat’, u tha ministri Çuçi drejtuesve të punimeve në kantier. Rehabilitimi i kanaleve vaditëse Murriz-Thanës-Krutje ka nisur në muajin tetor të vitit 2018.
Punimet duhet të përfundojnë brenda 8 muajve nga nënshkrimi i kontratës. Janë rreth 4 mijë e 300 hektarë tokë bujqësore në zonën e Myzeqesë që vaditen prej këtyre kanaleve, të cilat furnizohen nga rezervuari i Thanës, i cili është një prej më të mëdhenjve në Shqipëri dhe madje në rajon.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.