3.76 miliard lekë për koncesionin e laboratorëve – Financimi i spitaleve nga FSDKSH, 3.18 miliard lekë për paketat që ofrohen edhe në privat

24.3 mld lekë parashikohet të jetë buxheti total për financimin e shërbimeve shëndetësore në spitale nga ana e Fondit të Sigurimit të Detyrueshëm të Kujdesit Shëndetësor. Këshilli i Ministrave ka miratuar paketën e financimit për vitin 2021, ku vihet re një rritje e buxhetit total me rreth 2.2 mld lekë, në raport me një vit më parë.

Zëri më i madh buxhetor parashikohet të shpenzohet për pagesat e shërbimeve që ofrohen përmes partneritetit publik-privat, sikurse është ofrimi i shërbimit laboratorik të spitaleve universitare, rajonale dhe atyre bashkiake të Sarandës dhe Lushnjës apo siç njihet ndryshe koncesioni i laboratorëve.

Për këto shërbime, buxheti i vënë në dispozicion është 3.76 mld lekë, një vlerë që ka pësuar rritje në raport me vitin 2020, ku buxheti për PPP-të në sektorin spitalor ishte 3.29 mld lekë. Ndërkaq, 3.18 mld lekë në paketën e re të financimit janë planifikuar për paketat e shërbimeve, një vlerë thuajse e njëjtë me vitin 2020.

Kështu përfshihen paketat e kardilogjisë, kardiokirugjisë apo dializës, të cilat mbulohet financiarisht nga Fondi edhe në spitalet private, me të cilët është lidhur një marrëveshje. Sa i takon spitaleve, Qendra Spitalore Universitare “Nënë Tereza” ka buxhetin më të madh, në raport me institucionet  etjerë spitalorë, qofshin këta universitarë, rajonalë apo bashkiakë. Në total, për  QSUT-në është palnifikuar që fondi të financojë shërbimet me nje fond total prej 5.5 mld lekësh, me një rritje prej 0.5 mld lekë, në raport me një vit më parë.

Ola Mitre / SCAN       

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.