3 herë më pak turistë gjatë gushtit. Shifrat e INSTAT, përgjysmohen ata nga Kosova, shtohen të huajt që vijnë për punë
Hyrjet e shtetasve shqiptarë dhe të huaj në territorin shqiptar gjatë muajit gusht 2020 raportohen në 846.973. Krahasuar me gushtin e 2019-ës, kjo shifër rezulton në rënie 62,5%. Në Gusht 2020 ndërkohë , hyrjet e shtetasve të huaj në territorin shqiptar janë 575.559. Në të njëjtën periudhë të vitit të kaluar kjo shifër fiksohej në 1.55 milionë, pra thuajse 3 herë më e lartë. Numri i shtetasve të huaj të hyrë në Shqipëri në tetëmujorin 2020 është 1.745.169, duke rënë me 64,2 %, nga rreth 3.5 mln në gushtin e 2019-ës. Ajo që bie në sy tjetër nga të dhënat e sapopublikuara të Instat është se numri i shtetasve nga Kosova që kanë hyrë në Shqipëri gjatë gushtit është përgjysmuar krahasuar me të njëjtën periudhë të vitit të kaluar.
Kjo rënie drastike vjen pavarësisht faktit se mes dy shteteve tona nuk ka pasur barriera fizike si pasojë e pandemisë. Në gusht të 2019-ës, Shqipërinë e vizituan 781 mijë shtetas, ndërsa në gusht të këtij viti, vetëm 356 mijë. Një tjetër e dhënë që bie në sy është numri i shtetasve që kanë vizituar Shqipërinë për çështje pune apo biznesi gjatë gushtit. Kjo shifër është në rritje krahasuar me një vit më parë, duke u bërë treguesi i vetëm me shenjën plus. Janë 8916 shtetas të huaj që kanë vizituar Shqipërinë për çështje pune apo biznesi gjatë gushtit, në rritje me 11.9%, krahasuar me gushtin e kaluar. Edhe përgjatë tetëmujorit, në terma vjetorë, kjo shifër është në rritje me 11.4%, tregojnë të dhënat.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.