3 Javë nga Brexit – Theresa May pritet të humbasë në votimin e ditës së Martë
Theresa May pritet të dështojë në votimin e ditës së Martë për Brexit, duke patur rezultat akoma më të keq se përpjekja e muajit Janar për të kaluar marrëveshjen e saj në parlament, sipas Sunday Times. Shumica kundër qeverisë atëherë ishte me 230 vota, që është humbja më e madhe për një Kryeministër në më shumë se 1 shekull.
Teorikisht, nëse parlamenti refuzon marrëveshjen e saj, do të ofrohet një votim ditën e ardhshme nëse do të mbahet si alternativë dalja pa marrëveshje. Sipas Sunday Times, votimi i dytë mund të anulohet. Dështimi i Theresa May për të reformuar marrëveshjen me Brukselin, kryesisht masën parandaluese të Irlandës, ka bërë që shumë politikanë të parashikojnë se ajo mund të bindë parlamentin vetëm nëse jep dorëheqjen në muajin Qershor.
Kjo do të bëjë që një tjetër Kryeministër të drejtojë negociatat me Bashkimin Europian. Sipas the Observer, ministri i Brexit në Britani ka zhvilluar bisedime me opozitën për të gjetur alternativa nëse marrëveshja e Theresa May dështon të kalojë në parlament. Ndërkohë, një sondazh i publikuar nga Telegraph, tregon se më shumë votues kërkojnë që Britania të dalë pa marrëveshje nga Bashkimi Europian, nëse Brukseli nuk jep lehtësime të tjera.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.