3-mujori, dyfishohen turistët – 115 mijë të huaj vizituan Shqipërinë për pushime
Numri i shtetasve të huaj që kanë vizituar Shqipërinë për pushime në tremujorin e parë të këtij viti është dyfishuar. Sipas të dhënave nga Instituti i Statistikave, në Shqipëri kanë hyrë afërsisht 115 mijë shtetas të huaj, duke deklaruar se kanë ardhur për pushime.
Kjo shifër është në rritje me rreth 117% krahasuar me tremujorin e parë të vitit të kaluar. Shqipëria në vitet e fundit po fiton më shumë interes nga turistët e huaj, edhe për faktin që operatorët ndërkombëtarë e kanë promovuar si një destinacion të ri dhe pak të eksploruar.
Një avantazh konkurrues i Shqipërisë janë çmimet relativisht të ulëta, faktor që ky mund të ketë një ndikim të konsiderueshëm, në kushtet e një krize të zgjatur ekonomike në Europë.
Gjithsej, për tre muajt e parë të këtij viti në Shqipëri hynë afro 602 mijë shtetas të huaj, në rritje me 7.1% krahasuar me një vit më parë.
Në pjesën më të madhe, qëllimi i vizitës është i papërcaktuar qartë në deklarimet e bëra në sportelet e policisë kufitare dhe vetëm 19% janë deklaruar shprehimisht si turistë.
Ndërkohë, daljet e shtetaseve shqiptarë jashtë vendit për tre muajt e parë të vitit janë rritur lehtë, me 1.7% krahasuar me të njëjtën periudhë të një viti më parë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.