3 parkingje të reja në Tiranë – Shtohen hapësirat tek Pazari i Ri, Liqeni dhe 21 Dhjetori

3 parkingje të reja do t’i shtohen kryeqytetit dhe kryesisht në zona të mbingarkuara dhe me trafik të konsiderueshëm, ku qytetarët e kanë të vështirë të sigurojnë një vend për parkimin e automjeteve të tyre.

Agjencia “Tirana Parking” që menaxhon këtë proces ka publikuar në Agjencinë e Prokurimit Publik  tenderat për studim-projektim në tre sheshe të reja.

Konkretisht bëhet fjalë, për “Studim dhe Projektim i ndërtimit të Shesh-Parkimit tek Avni Rustemi”, me vlerë 270 mijë lekë; Studim dhe Projektim i ndërtimit shesh Parkimi tek Diga e Liqenit me vlerë 809 mijë lekë; studim dhe projektim i ndërtimit Shesh Parkimi tek Rruga Sabaudin Gabrani me vlerë 1.2 milion lekë.

Përpos Sheshit Skënderbej dhe parkimit nëntokësor pranë Stacionit të Trenit që aktualisht janë në ndërtim e sipër, Bashkia ka parashikuar që gjatë këtij viti të vihen në funksion edhe 10 parkingje të reja që do të administrohen nga agjencia “Tirana Parking”. Së fundmi Bashkia ka mundësuar që në disa rrugë dhe sheshe kryesore, qytetarët të mund të parkojnë automjetet e tyre të paguajnë përmes celularit.

Vetëm duke dërguar një mesazh në numrin 50500 dhe duke dhënë targën e tyre, automatikisht kryhet pagesa.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.