30 vite pas rënies së Murit të Berlinit, studimi jep alarmin: “Demokracia është sërish në rrezik”
Tre dekada pas rënies së Murit të Berlinit, kolapsit të së ashtuquajturës “Perdja e Hekurtë” dhe si pasojë edhe i Bashkimit Sovjetik, liria dhe sundimi i ligjit janë ende të paarritshme për miliona njerëz në Europën Qendrore, ka zbuluar rezultati i një sondazhi.
Më shumë se 12,500 njerëz nga 7 shtete të Europës Qendrore – Bullgaria, Republika Çeke, Gjermania, Hungaria, Polonia, Rumani dhe Sllovakia – ishin pjesë e studimit të ndërmarrë nga Fondacioni Shoqëria e Hapur.
“Shihet një nivel alarmues mosbesimi ndërmjet qytetarëve të Europës Qendrore dhe Lindore kundrejt qeverive, të ushqyera nga pasiguritë e përhapura referuar kushteve të sistemeve demokratike dhe një ndjenjë mbizotëruese e kufizimit relativ që nga viti 1989.” – citohet në raport – “Duket se disa prej lirive të fituara në revolucionin e 1989 janë tashmë nën presion.”
Më shumë se gjysma e njerëzve të studimit në Republikën Çeke konfirmuan se demokracia është në rrezik me gjeneratën e vjetër, ata të lindur para 1946, të shprehur si më pesimistët mbi këtë pyetje.
Në Bullgari (76%), Rumani (54%) dhe Hungari (52%), shumica e të anketuarve gjithashtu besojnë se zgjedhjet nuk janë të lira dhe të ndershme në vendin e tyre ndërsa një shumicë e të anketuarve në pesë nga vendet e anketuara raportuan se kishin frikë nga pasojat negative nëse ata kritikojnë qeverinë në publik me përqindjen më të lartë të regjistruar në Hungari (66%).
Për më tepër, mbi 60% në çdo vend të anketuar mendojnë se sundimi i ligjit është nën kërcënim.
Një mesatare prej 63% e të anketuarve gjithashtu thanë se nuk besojnë në informacionet që u jepen nga qeveritë. Kjo është veçanërisht e theksuar në Sllovaki (72%) dhe në mesin e moshave nën 40-vjeç, ndërsa në shumicën e vendeve, ata mbi 40-vjeç – të cilët kujtojnë rënien e Murit të Berlinit – shprehen se mbulimi i mediave është bërë më i mirë në 30 vitet e fundit.
Sidoqoftë, shoqëritë civile shihen si një forcë kryesore për të mirë nga 66% e njerëzve dhe brezi i ri – Gjenerata Z – veçanërisht entuziaste.
Më shumë se dy të tretat e popullsisë në përgjithësi kanë raportuar pjesëmarrje në të paktën një formë të veprimtarisë civile brenda 12 muajve, ku të rinjtë së bashku me gratë kryesojnë listën.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.