31 leje minerare në lojë gjatë Majit – MIE hap procedurat, mbizotëron kromi
Gjatë muajit Maj, Ministria e Infrastrukturës dhe Energjisë do të presë oferta për 31 zona minerare. Pjesa më e madhe e këtyre zonave kanë qenë të miratuara në planet vjetore të mëparshëm, duke nisur nga viti 2011.
Ministria shpalli procedurën e parë në fillim të Prillit për 16 leje, afati i fundit për të cilat janë datat 2, 3 dhe 4 Maj. Ndërsa këtyre lejeve u shtohen 15 të tjera, me afat përfundimtar për pranimin e ofertave datat 28, 29 dhe 30 Maj.
Procedura nuk është e kufizuar në pjesëmarrje në bazë të shtetësisë, çka nënkupton se edhe kompanitë e huaja mund të garojnë për të fituar lejet e shfrytëzimit. Ndërkohë, për shoqëritë fituese, kusht është pajisja me leje mjedisi dhe vendim nga KKT. Vetëm pas marrjes së lejeve të mësipërme, shoqëria do të mund të pajiset me lejen minerare.
Ndër zonat minerare, mbizotërojnë minierat për nxjerrjen e kromit, por nuk mungojnë as mineralet e tjera si bakri, guri gëlqeror, etj.
Vetëm një javë më parë, MIE shpalli edhe fituesin e garës për Minierën e Vlahnës në Kukës, burimit të dytë më të madh të kromit në vend.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.