350 mln lekë të reja dëm ndaj shtetit – Arrestohen 4 persona në kryeqytet
I kanë shkaktuar shtetit një dëm prej 350 milionë lekë të reja. Katër persona janë vënë në pranga nga policia, pasi në bashkëpunim me njëri-tjetrin kishin krijuar një skemë mashtrimi me firma fiktive me qëllim shmangien e pagesave të TVSH dhe tatimfitimin. Gjithashtu janë shpallur në kërkim edhe gjatë persona të tjerë për të cilët për shkak të hetimit nuk bëhen me dije të dhëna të tjera.
Nga Seksioni për Hetimin e Krimit Ekonomik dhe Financiar në bashkëpunim me Prokurorinë e Rrethit Gjyqësor Tiranë dhe Hetimin Tatimor, në kuadër të operacionit të koduar “TVSH”, u bë arrestimi i shtetasve:
– G. Ç., 59 vjeç banues në Tiranë
– F. Z., 67 vjeç, banues në Tiranë
– Xh. K., 58 vjeç, banues në Tiranë
– Y. M., 58 vjeç banues në Tiranë, i dënuar më parë për “Mashtrim”
“Këta shtetas në bashkëpunim me njëri- tjetrin kishin krijuar një skemë mashtrimi duke krijuar gjashtë firma fiktive me nipte shëtitës, me seli në qytetin e Tiranës, me qëllim shmangien e pagesave të TVSH dhe tatimfitimin, duke i shkaktuar shtetit dëm në vlerë TVSH-je dhe tatimfitimi në vlerën e 350 milionë lekë të reja. Materialet proceduriale ju kaluan Prokurorisë pranë Gjykatës së Shkallës së Parë Tiranë në ngarkim të shtetasve të lartpërmendur, për veprat penale të “Fshehje të ardhurash”, “Mospagimi i taksave dhe tatimeve”, “Krijimi i skemave mashtruese lidhur me tatimin mbi vlerën e shtuar” dhe “Falsifikimi i vulave stampave dhe formularëve”, parashikuar nga nenet 180, 181, 144/a dhe 190 të Kodit Penal”, thuhet në njoftimin e Policisë së Shtetit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.