350 persona duhet të dorëzojnë pasaportat diplomatike – Cakaj: Do të bllokohen menjëherë dhe do të bëhen të pavlefshme
350 shtetasit shqiptarë që posedojnë një pasaportë diplomatike, duhet ta dorëzojnë atë menjëherë. Paralajmërimi ka ardhur nga ministri në detyrë për Europën dhe Punët e Jashtme, Gent Cakaj, i cili përmes një deklarate për shtyp është shprehur se ato do të shpallen të pavlefshme, pasi janë në kundërshtim me ligjin.
“Sot në Shqipëri ka më tepër se 350 persona që mbajnë pasaportë diplomatike në shpërputhje me ligjin dhe që dalin e hyjnë në për kufijtë ndërkombëtare si personalitete me status të veçantë. I ftoj publikisht të gjithë të bëjnë menjëherë dorëzimin e pasaportës diplomatike, sepse pasaportat e tyre diplomatike do të bllokohen menjëherë dhe do të shpallen të pavlefshme”, u shpreh Cakaj.
Ndërkohë , ka shtuar më tej se do t’i dorëzojë qeverisë për shfuqizim VKM-në e cila u jep të drejtën e pasaportës diplomatike disa kategorive specifike, që përfshijnë: drejtuesit e anëtarëve të bordeve, udhëheqësit e Enteve, autoriteteve të ndryshme rregullatore deri tek shoferët e disa institucioneve.
“Përmirësimi i kuadrit ligjor për kriteret e lëshimit të pasaportës diplomatike është kusht i domosdoshëm për t’ia kthyer dinjitetin asaj. Prandaj, unë menjëherë do t’i përcjell qeverisë për vendim abrogimin e VKM-së që u jep të drejtën e pasaportës diplomatike drejtuesve të anëtarëve të bordeve, udhëheqësve të Enteve, e autoriteteve të ndryshme rregullatore deri tek shoferët e institucioneve të caktuara. Plani i veprimit për të gjitha hapat e mëtejme për ndryshimin e kuadrit ligjor dhe administrativ për lëshimin e pasaportës diplomatike është gati dhe është në përputhje me standardet më rigoroze europiane për bartjen e pasaportës diplomatike.”
Vetëm pak ditë më parë, ministri Cakaj njoftoi edhe pezullimin e targave diplomatike për të gjithë konsujt e nderit, duke argumentuar se ishin në kundërshtim me ligjin.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.