36 % e bizneseve “fshihen” – Anti-informaliteti në 46 ditë, veriu “kampion”

1764 subjekte në të gjithë vendin janë përballur me  grupe kontrollesh nga administrata tatimore përgjatë periudhës 1 korrik -15 gusht 2019,  ku 36 përqind e tyre janë kapur në informalitet.

Të dhënat e detajuara të siguruara nga SCAN, tregojnë informalitetin në nivele të larta në vend, ku 642  subjekte kanë përfituar të ardhura,  ndërsa nuk kanë punuar sipas legjislacionit në fuqi, duke bërë evazion fiskal.

Shkeljet më kryesore janë në drejtim të mos lëshimit të kuponit tatimor, mos deklarimit të xhiros reale apo mos regjistrimit të punonjësve.

Nga të dhënat, vihet re se përqindjen më të lartë të subjekteve të kapura në shkelje në raport me numrin total të kontrolleve, e zë rajoni i veriut me 46 përqind, e ndjekur nga rajoni qendror me 37 përqind dhe në fund renditet rajoni jugor me 26 përqind, pavarësisht se sektori i shërbimeve më së shumti është i përqendruar në jug të vendit.

Ndërkaq, plani operacional antiinformalitet po vijon me intensitet, i shtrirë në të gjithë sektorët e ekonomisë dhe nuk ka një afat të përcaktuar zbatimi.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.