36% e bizneseve në informalitet – Në 3 muaj, 1688 punonjës u kapën në të zezë
Në tre muaj të zbatimit të planit operacional kundër informalitetit, Inspektoriati Shtetëror i Punës ka kontrolluar 2475 aktivitete, ku 892 kanë rezultuar me punonjës informal. Shifrat i përkasin periudhës 1 Korrik-23 Shtator 2019, dhe e përkthyer në përqindje, rezulton se 36 për qind e subjekteve kanë qenë në shkelje.
Numri më i lartë i subjekteve që kanë shkelur ligjin është në qytetin e Durrësit, ndërsa më pak regjistrohen në qytetin e Fierit.
Kështu, referuar të dhënave zyrtare nga Inspektoriati Shtetëror i Punës, në 892 subjekte me risk informaliteti me 5532 punëmarrës të evidentuar në këto subjekte 1688 punonin të padeklaruar ose 31% e totalit të punëmarrësve të evidentuar, ku minimumi i kostos së munguar në arkën e shtetit për sigurim shoqëror e shëndetësor për një muaj, për këta punëmarrës, është në 12.2 milion lekë.
Llogaritur mbi bazën e pagës minimale prej 26000 lekë. Pas konstatimit në të zezë, 1464 punëmarrës janë formalizuar brenda fatave inspektuese.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.