39% e remitancave vijnë me autobuzë e miq – Minxhozi: Të ulen kostot e transfertave. Isaj: Të shfrytëzohen bankat, të informohen emigrantët

Remitancat hyjnë në Shqipëri në masë të konsiderueshme në rrugë informale, gjë që pengon investimin e tyre në mënyrë eficente në ekonomi. Zëvendësguvernatorja e Parë e Bankës së Shqipërisë Luljeta Minxhozi ka analizuar rëndësinë që kanë remitancat në jetën ekonomike të vendit, por veçanërisht të potencialit që ato kanë për tu kthyer në faktor zhvillimi për vendin. Minxhozi theksoi domosdoshmërinë e uljes së kostove të transferimit të remitancave në vend.

Brunilda Isaj, Sekretare e Përgjithshme e Shoqatës Mikrofinanca Shqiptare tha se vetëm 61% e remitancave hyjnë në Shqipëri përmes kanaleve zyrtare. Pjesa tjetër e tyre vijon të hyjnë përmes autobusëve, apo të afërmve. Isaj tha se emigrantët hezitojnë të përdorin sistemin bankar, megjithëse prej kohësh disa banka kanë krijuar dritare të veçanta për këtë qëllim.

Përfaqësuesja e Bankës Botërore tha gjatë takimit për Ditën e remitancave se kostot e trasferimeve të parave në Shqipëri janë më të lartat në rajon, por edhe në rang global.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.