4.1 milionë euro për pushtetin vendor – Si ndahen fondet/ Përfitojnë bashkitë më “borxhlije”, kryeson Kavaja

Pushteti vendor do të marrë nga qeveria një shumë prej 500 milionë lekësh apo 4.1 milionë eurosh,  në formë transferte specifike, e cila do të shpërndahet,  duke marrë si kriter  peshën e detyrimeve të secilës prej bashkive ndaj totalit të detyrimeve të prapambetura të muajit shtator 2021.  Fondi është vendosur në dispozicion përmes aktit normativ, i cili rishikoi buxhetin e vitit 2021 për të bërë disa akomodime në prag të mbylljes së vitit.  Sipas ndryshimeve, ky fond përdoret për shlyerjen e detyrimeve të  prapambetura, duke nisur nga detyrimi më i vjetër i papaguar.

Po të analizojmë detyrimet e prapambetura të secilës bashki, vihet re se stoku i borxhit deri në Shtator 2021, regjistrohet në 7.3 miliardë lekë.  Bashkia që ka vlerën më të lartë të detyrimeve të akumuluara dhe që kryeson listën është Kavaja, me 1.13 miliardë lekë, e ndjekur nga Bashkia Tiranë me 877 milionë lekë. Më pas renditet bashkia Vorë me rreth 668 milionë lekë,  e ndjekur nga Malësia e Madhe me 464 milionë lekë,  Belsh me 417 milionë lekë dhe Pogradec me 346 milionë lekë.

Bashkia Lezhë ka akumuluar 290 milionë lekë detyrime, Bashkia Kamëz 265 milionë dhe Berat 236 milionë.  Ndërsa bashkitë e tjera kanë detyrime në vlera të ulëta, deri në të pakonsiderueshme. Ajo që vihet re është se vlera e detyrimeve të prapambetura nuk lidhet domosdoshmërisht me sipërfaqen apo numrin e banorëve të një bashkie. Kështu, bashkitë e rendituar si ato më “problematiket” në këtë drejtim, në fakt do të jenë përfitueset kryesore të këtij fondit, me qëllim uljen e detyrimeve të prapambetura.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.