4.1 mld lekë borxhe ndaj UKT – Klientët familjarë më problem, 533 institucione nuk paguajnë
Në fund të Marsit 2018 shuma e borxheve të akumuluara nga klientët që marrin shërbimin e ujit të pijshëm, ka arritur në 4.1 miliardë lekë. Të dhënat janë bërë me dije nga Shoqëria Ujësjellës Kanalizime Tiranë, ku duket se borxhi total në 3 muajt e parë të viti ka ardhur në rënie progresive. Ndërsa UKT po vijon me intensitet reformën në sektorin e ujit të pijshëm, reformë që për bizneset ka filluar në muajin Shkurt dhe për klientët familjarë në muajin Mars, shifrat tregojnë që numri i debitorëve vijon të mbetet i lartë, dhe në muajin mars ka arritur në rreth 77 mijë.
Duhet theksuar se sistemi i kategorizon automatikisht si debitorë edhe klientët që nuk paguajnë në datën e caktuar detyrimet për ujin e pijshëm. Nga të dhënat vihet re se problematika më e madhe qëndron tek konsumatorët familjarë që përbëjnë edhe peshën më të madhe të debisë si në numër edhe në vlerë. Kryesisht, më problem janë konsumatorët në ish komuna që me reformën administrative-territoriale u janë bashkuar Tiranës.
Ndërkohë që edhe pse zënë peshën më të vogël në shifrën e debisë, rezultojnë 533 institucione shtetërore që janë në borxh me UKT-në, dhe që kanë treguar mungesë korrektese në pagesën e ujit të pijshëm. Sa i përket numrit të bizneseve, 13 mijë prej tyre paraqesin problem me pagesat. Nga ana tjetër, numri i kontratave të lidhura nga UKT, gjatë kësaj periudhe ka qenë tejet i lartë. Janë në total 221 mijë kontrata të lidhura në zonat urbane dhe 23.589 kontrata të lidhura në zonat rurale.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.