4.9 mln USD për punësim – Aplikojnë 450 biznese, SHKP në fazë përzgjedhjeje
450 biznese kanë aplikuar pranë Shërbimit Kombëtar të Punësimit për të përfituar nga fondi për nxitjen e punësimit prej 4.9 milionë dollarësh të vënë në dispozicion për vitin 2017.
Burime zyrtare nga ky institucion, bëjnë me dije për TV SCAN se nga këto, 180 janë subjekte juridike dhe 270 subjekte e fizike që kanë dorëzuar aplikimet e tyre në zyrat e punës në rrethe.
Aktualisht Shërbimi Kombëtar i Punësimit është në fazën e vlerësimit të aplikimeve, përmes një sistemi pikëzimi, nëse këto subjekte përmbushin kriteret për përfitim.
Por megjithëse fondi në total është 490 milion lekë, për aplikimet e këtij viti është parashikuar të disbursohen 375 milion lekë, ndërsa pjesa tjetër e fondit, do të shkojë për financimin e disa biznese që janë shpallur fituese vitin që lamë pas.
Kjo mbështetje aplikohet për të disatin vit radhazi, me qëllim nxitjen e bizneseve që të krijojnë vende të reja pune. Mbështetja e bizneseve me këtë fond ka sjellë efekte direkte, duke punësuar çdo vit rreth 3-4 mijë të të papunë.
Shpërndarja e parave për bizneset përfituese bëhet me këste dhe shkon për 4 paga të paguara nga shteti në masën e pagës minimale dhe sigurimet shoqërore e shëndetësore për një vit për çdo individ të punësuar.
Ndërkohë prioritet do të kenë edhe zonat e pazhvilluara, si ato veriore të vendit, për shkak se papunësia është më e lartë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.