434 milionë lekë për Karavastanë dhe Nartën/ Çfarë parashikon projekti i Ministrisë së Bujqësisë? Detajet

Ministria e Bujqësisë ka shpallur një tender për rehabilitimin e veprave të programit ujitje – kullim, në Rajonin Jug.

Fondi i vënë në dispozicion është 434.2 milionë lekë dhe është kanalizuar në dy lote, respektivisht Loti I, me fond 157,6 milionë lekë dhe me objekt “Mbrojtje e argjinaturës se Selevecit ne Lagunën e Nartës, Novosele”, si dhe Loti II, me fond 276.5 milionë lekë dhe me objekt tenderi “Rehabilitim i hidrovorit të Karavastasë”.

Referuar të dhënave të bashkangjitura në Agjencinë e Prokurimit Publik, projekti i parë synon riaftësimin e argjinaturës së Selevecit në të gjithë gjatësinë e saj, si dhe punime për mbrojtjen e skarpatës se brendshme nga dallgët, luhatjen e nivelit të detit, apo baticat dhe zbaticat. Afati për ekzekutim, sipas relacionit teknik, është 8 muaj, që nga nënshkrimi i kontratës me subjektin fitues.

Nga ana tjetër, projekti i dytë për rehabilitimin e hidrovorit të Karavastasë ka një afat 1 vjeçar për ekzekutim dhe ka për qëllim që nëpërmjet rikonstruksionit te hidrovorit Karavasta, te siguroje kullimin e sigurt 10 000 ha tokë bujqësore dhe te kripur te zonave Divjakë, Lushnjë dhe Fier.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.